Grup hyu mă bruă čih pioh bơni kơ tơhan pơgang guai dêh čar ƀơi Dak Lak pok pơhai ngă tui khut khăt tơpă hnơ̆ng hơdôm bruă ngă hyu pơgăn ngă soh, mă akan hơdang tui tơlơi pơtrun IUU; prăp lui hlâo ngă hrŏm djop tơring čar, plơi pla hăng lu tơhan kơnuk kơna hyu ĕp jŭ yap djop ƀattô song nan anet prong mă akan hơdang, kơtưn hyu tir amăng ia rơsĭ hrŏm hăng bruă pơgang tơlơi dưi ngă pô, pơgang tơlơi rơnuk rơnua hơđong dêh čar.

Bruă ngă hyu pơtô pơblang ăt pơtrut lu, kiăng mơnuih ƀôn sang thâo hluh, djru ba pô khua, sang anŏ hơmâo ƀattô, song nan, mơnuih mơgăt ƀattô laih anun abih bang mơnuih ƀôn sang hyu mă akan hơdang thâo kơ boh tơhnal sat tơdah ngă soh glăi tơlơi pơkă IUU. Hlâo kơ anun, grup nao ĕp lăng ƀơi anih dŏ mă bruă sem lăng mơ̆ng tơhan pơgang guai dêh čar, tơdrun mă  akan hơdang ia rơsĭ ƀơi Dak Lak. Boh yom phun nao ĕp lăng pơtum kơ bruă ngă hrŏm wai lăng ƀattô hyu mă akan hơdang, čih pioh mrô rơnoh mut tơbiă ƀơi tơdrun kompan hrơi mông sit nik, pơsir abih hlơi ngă soh glăi tơlơi pơkă IUU hăng ba yua boh thâo ia rơgơi phrâo pioh krăp lăng mơ̆ng ataih, ĕp ten phun tơdŭ akan hơdang hơmâo mă ba glăi anun mơ̆ng anih ia rơsĭ pơpă, djơ̆ amăng anih brơi hyu mă akan hơdang mơ̆n hă.