Ƀơi mông jơnum, ƀing khua mua hơmâo pơčrong sai, lăi pơthâo tơlơi pơgôp hiăp hơdôm mơta tơlơi kah hăng: Akŏ pơjing grup thâo sa hnơ̆ng bruă pioh pơtong glăi boh tơhnal jŭ yap; tơlơi thâo, anŏ tŭ yua sit ba yua AI amăng bruă jŭ yap glăi; bruă pơphun či ngă, mă tơlơi pơgôp hiăp mơ̆ng khul, grup mơnuih tơpuôl, ƀing ngă bruă mơdrô….

Klah čun ƀơi mông jơnum, Kơ-iăng khua dêh čar ơi Lê Tiến Châu lăng yom bruă ngă hrŏm mơ̆ng djop ding jum, anom bruă, tơring čar hăng čih pioh boh tơhnal dưi ngă hnang blung amăng bruă jŭ yap glăi. Laih dơ̆ng, Kơ-iăng khua dêh čar ăt pơtă pơtăn, jăm ƀuah ƀiă hơdôm boh ding jum, anom bruă, tơring čar aka ƀu ngă tui hur har ôh, tui hăng tơlơi git gai pơčrâo ba mơ̆ng Ding jum kơđi čar. Kơ-iăng khua dêh čar rơkâo djop ding jum, anom bruă, tơring čar đing nao pơtum ĕp mơnuih mă bruă, kiăo tui tơlơi  jao brơi jŭ yap abih bang djop mơta hră pơar hơmâo pơtrun. Amăng anun, đing nao hơdôm tơlơi pơgôp hiăp mơ̆ng mơnuih ƀôn sang, ƀing ngă bruă mơdrô, hơdôm mơnuih bơbeč djơ̆ mơ̆ng tơlơi phiăn yua mơ̆ng hră pơar pơtrun anun.