Adơi Bùi Trần Diễm Quỳnh glăk hrăm anih 9A1, Sang hră gưl dua Trần Quang Diệu, să Hoà Thuận, plơi prong Buôn Ma Thuột. Ñu lăi, glông jơlan mơ̆ng sang nao pơ sang hră ataih 2km, tui jơlan Hồ Chí Minh (Jơlan prong 14). Ñu đĭ rơdêh đuăi hăng apui lơtrik či nao hrăm hră, ñu thâo pơmin mă pô kiăng pơhlôm rơnuk rơnua:

“Mơ̆ng sang nao truh pơ sang hră abih bang lêng kơ nao ƀơi jơlan prong soh yơh. Kâo nao sang hră hăng rơdêh pơkĕ apui lơtrik giăm 4 thun anai laih, lơ̆m nao lĕ kiăo tui Tơlơi phiăn jơlan glông, đoa muk pơgang akŏ, nao djơ̆ lan, ƀu pơđuăi tơkang bliă arăng ča čot ôh...Lơ̆m nao pơ sang hră lĕ lăng ngŏ lăng yŭ, ba pơmut rơdêh khŏm rơnang, dưm rơdêh djơ̆ glông, lơ̆m glăi lĕ ñu ngă tui anun mơn”.

Sang hră gưl dua Trần Quang Diệu, să Hòa Thuận, plơi prong Buôn Ma Thuột, dŏ ƀơi jơlan Hồ Chí Minh (Jơlan prong 14), ataih mơ̆ng sang čơ Đạt Lý aka ƀu truh 200 met ôh. Dua bơnah jơlan hơmâo lu sang sĭ gơnam, anun amăng lu thun anai, amăng mông hơmâo lu mơnuih nao rai lĕ ƀơi anăp sang hră juăt dun rơdêh biă. Nai Nguyễn Văn Dũng - Khua sang hră brơi thâo, sang hră hơmâo ngă lu hơdră pơhlôm rơnuk rơnua jơlan nao rai kơ 1.400 čô čơđai, biă ñu lĕ ƀơi anăp sang hră.        

“Abih bang mông kơkuh kơ hla kơ rim hrơi sa, sang hră hơmâo pơphun ngui ngor mơ-ak ƀơi yŭ hla kơ hăng tơlơi ngă sen pơtô brơi čơđai hla tui Tơlơi phiăn jơlan glông. Rơngiao kơ anun, sang hră ăt brơi ƀing grup hla kơ mriah ngă hrŏm hăng hơdôm čô nai đah kơmơi pơčrâo brơi ƀing čơđai lan nao rai lơ̆m mut tơbiă amăng sang hră, pơtô brơi čơđai nao gah adih jơlan. Laih dong ăt hơmâo dong mơn bah amăng gah tlôn, mông hơmâo lu đơi mơnuih nao rai ƀơi jơlan lĕ pok bah amăng gah tlôn brơi ƀing čơđai tơbiă”.

Trung tá Nguyễn Trọng Nghĩa - Kơ-iăng khua tơhan wai lăng jơlan Kông an tơring čar Dak Lăk lăi pơthâo, kiăng pơhlôm rơnuk rơnua jơlan nao rai ƀơi anăp hơdôm boh sang hră kơtuai jơlan prong, jơlan tơring čar, hrơi blan rơgao, anom bruă hơmâo pơkiăo nao tơhan dŏ gak ƀơi anăp sang hră či pơčrâo brơi jơlan kiăng abih bang nao rai rơnuk rơnua amăng mông hơmâo lu đơi rơdêh; laih dong bơtơhmal mơtăm ƀing čơđai ngă soh tơlơi phiăn rơnuk rơnua jơlan nao rai kah hăng mơgăt rơdêh rơgao 50 phân khô̆i lơ̆m aka ƀu truh thun, ƀu klum đuăn pơgang akŏ, ƀu hơmâo hră mơgăt rơdêh, pơgiăng rơgao mrô mơnuih pơkă; bơtơhmal mơn amĭ ama ƀing čơđai tơdah jao rơdêh brơi pô mơgăt aka ƀu djŏp thun; ngă hrŏm hăng hơdôm boh sang hră akŏ pơjing hơbô̆ bruă ƀơi anăp bah amăng sang hră nao rai rơnuk rơnua...Trung tá Nguyễn Trọng Nghĩa lăi.

“Kiăng pơhlôm rơnuk rơnua jơlan nao rai ƀơi anăp sang hră, Anom bruă tơhan kông an wai lăng jơlan Kông an tơring čar Dak Lăk ngă hrŏm hăng hơdôm boh sang hră ƀơi hơdôm glông jơlan prong 14, 26 hăng 27 hrŏm hăng kông an hơdôm boh să, pơtô kơ ƀing čơđai, amĭ ama ƀing čơđai, nai pơtô ngă tui tơlơi phiăn nao rai ƀơi jơlan; hyu plĕ hră, tĕp pano ap phič akŏ pơjing hơbô̆ bruă ƀơi anăp sang hră jê̆ giăm, rơnuk rơnua. Gơmơi pơsit bruă kiăng ngă lĕ khŏm ngă re se, khut khăt hloh”.

Tơring čar Dak Lăk ră anai hơmâo giăm 490.000 čô čơđai mơ̆ng anih muai truh kơ gưl 3, tui hrăm ƀơi 1.006 boh sang hră. Lu sang hră giăm jơlan mrô 14 (jơlan Hồ Chí Minh), Jơlan prong 26, 27 hăng hơdôm glông jơlan tơring čar, hrŏm hăng lu jơlan nao rai ƀơi tơring glông, hăng plơi prong Buôn Ma Thuột, anih hơmâo lu jơlan nao rai amuñ hơmâo tơlơi truh, ƀu rơnuk rơnua. Ơi Phạm Đăng Khoa - Khua anom bruă pơtô hăng pơjuăt tơring čar Dak Lăk brơi thâo, hrơi blan rơgao mah anom apăn bruă, hơdôm boh sang hră ngă klă laih bruă pơtô brơi tơlơi phiăn jơlan glông kơ ƀing čơđai, amĭ ama ƀing gơñu, samơ̆ tơlơi pơmin mơ̆ng čơđai hăng sang anŏ ƀing gơñu aka ƀu djơ̆ ôh. Ăt hơmâo mơn bruă ƀu hơđong, rung răng ƀơi hơdôm boh sang hră, biă ñu amăng mông čơđai tơbiă mơ̆ng sang hră. Kiăng pơgăn bruă anai, Gơnong bruă hơmâo ngă hrŏm hăng anom apăn bruă pơtô lăi iâu pơthưr amĭ ama ƀing čơđai, ƀing čơđai hăng mơnuih ƀôn sang amăng kual thâo pơmin hloh ngă tui Tơlơi phiăn nao rai ƀơi jơlan; lơ̆m ba ană bă nao hrăm kiăng kiăo tui tơlơi pơtô brơi mơ̆ng ƀing kông an, mơnuih djru bruă; pok prong hơbô̆ bruă rơnuk rơnua jơlan nao rai ƀơi anăp sang hră.

“Kiăng pơhlôm rơnuk rơnua hơđong jơlan nao rai hăng ƀing čơđai, amĭ ama hăng nai pơtô, Gơnong bruă hơmâo pơtrun lu hră pơ-ar pơtô ba hơdôm boh sang hră ngă bruă klă pơhlôm rơnuk rơnua jơlan, biă ñu amăng mông ba čơđai nao hrăm hăng čơkă čơđai glăi. Hơdôm boh sang hră ƀơi hơdôm boh tơring glông plơi prong ăt ngă hrŏm kơjăp hăng tơhan wai lăng jơlan či pơtô pơblang, pôr pơthâo tơlơi phiăn nao rai ƀơi jơlan glông kiăng ƀing čơđai thâo rơđah lơ̆m nao rai đah mơ̆ng rơnuk rơnua”.

Hăng tơlơi gum ngă mơ̆ng djŏp anom bruă, tơlơi thâo pơmin mơ̆ng amĭ ama, čơđai sang hră lơ̆m nao rai ƀơi jơlan, bruă dun rơdêh, ƀu hơđong ƀơi anăp sang hră či Dak Lăk amăng mông čơđai tơbiă mơ̆ng sang hră amra hơmâo pơsir tui amăng ƀrư̆, djru akŏ pơjing hơbô̆ bruă sang hră mơtah, hơdjă, hiam hăng rơnuk rơnua jơlan nao rai./.