Amăng mông jơnum anai, Khul apăn bruă Ping gah tơring čar Dak Lak hơmâo lăi pơthâo hơdôm tơlơi pơtrun pơplih anih mă bruă hăng ƀing apăn bruă gah gơnong bruă phiah phiăn, gơnong bruă prăk kak, gơnong bruă ngă hmua hăng pơđĭ kyar ƀon lan, anom bruă Jơnum min mơnuih ƀôn sang tơring čar, khul hlăk ai tơring čar, Khul djuai ania, Khul apăn bruă Ping gah hơdôm tơring glông Ea Kar, Ea Sup, Krông Ana, Buôn Đôn hăng Ea Hleo.

Đĭ pơhiăp amăng mông jao bruă, ơi Nguyễn Đình Trung, Ding kơna khul apăn bruă Ping gah, Khua git gai Ping gah tơring čar Dak Lak lăi rơđah, amăng ruah mơnuih apăn bruă, pơplih anih mă bruă lĕ bruă tŏ tui na nao hăng jing tơlơi yôm kiăng pơjuăt brơi bruă mă tui tơlơi sit nik, hrưn đĭ kjăp amăng bruă git gai djop mơta mơng ƀing apăn bruă.