Hơmâo laih giăm 500 ring bruă hlăk ai hơmâo ngă tui hăng abih tih giăm 7,8 klai prăk. Anai lĕ boh than dưi ngă yôm phun hơmâo lăi pơthâo amăng jơnum klah čun tal pơphun hlăk ai gum djru bơyan pơdơi prong thun 2023 mơng Khul hlăk ai tơring čar Dak Lak pơphun amăng rơwang hrơi tơjuh laih rơgao. Hăng anăn hlăk ai Dak Lak ba jơlan hlâo pơplih mă yua boh thâo phrâo, tal pơphun hlăi nao gum djru bơyan pơdơi prong tơring čar Dak Lak thun anai pok pơhai hăng rơbêh 830 grup gum djru, 270.400 wŏt hlăk ai mut hrŏm.

Amăng 3 blan pok pơhai, đơ đơm tơring čar hơmâo ngă tui giăm 500 ring bruă hlăk ai hăng abih tih giăm 7,8 klai prăk. Hơdôm ring bruă đing nao hơdôm bruă anun lĕ: mut hrŏm man pơdong plơi pla phrâo, plơi prong hiam; pơgang anih dŏ hơdip jum dar, bong glăi ayuh hyiăng pơplih sat; pơhlôm  tơlơi hơdip mơnuih mơnam hăng djru brơi ƀing čơđai. Lu bruă mă đing nao hơdôm plơi pla kual ataih, kual giăm guai ƀơi hơdôm tơring glông Lak, Mdrak, Buôn Đôn, Ea Sup hăng Krông Bông.