Dong mơ̆ng akô̆ blan 9 mơtăm anom sĭ mơdrô mơ̆ng ơi Nguyễn Quốc Lập giăm jơlan tơring čar mrô 1, thôn 5, să Ea Wer, tơring glông Buôn Đôn, tơring čar Dak Lak kông ang să pel ĕp rim tal bruă pơgang pơgăn apui ƀong. Ñu brơi thâo, tơdơi kơ dưi lăi pơhing, pơtô brơi, rơbêh sa thun hlâo hmâo rŏng gum hrŏm "Grŭp pơlir dang anô̆ pơhlôm pơgang apui ƀong”. Anom sĭ mơdrô dưi prăp lui bruă pơgang, pơgăn apui ƀong pơtuh hmâo: get pơgang apui, mut. Kơnong kơ teng leng lăi pơthâo hmâo pơlir kơplah wah hơdôm bôh sang anô̆. Ơi Lập lăi pơthâo kơ tơlơi pơkă bruă mă grŭp pơgang pơgăn apui ƀong ƀơi anom sĭ mơdrô mơ̆ng sang anô̆:

“Amăng grŭp anai hmâo 10 bôh sang anô̆, leng kơ dưi prăp lui bruă pơgang pơgăn apui ƀong hăng pơlir nao rai tơdruă. Lơm hmâo apui ƀong hăng teng leng lăi pơthâo, abih bang 10 bôh sang anô̆ amra tŭ mă teng leng lăi pơthâo apui ƀong, laih anun pơsit anih anom apui ƀong ƀơi hơpă thơ djop mơnuih amra tum pơƀut pioh pok pơhai bruă pơgang pơgăn apui ƀong”.

Grŭp pơlir hơbit pơhlôm pơgang pơgăn apui ƀong pơjing ƀơi să Ea Wer hmâo hơdôm bôh sang anô̆ bơwih ƀong sĭ mơdrô gơnam tam, kơmok pruai, jrao pơgang phun pla, anih pơkra rơdêh thut... giăm nao rai. Ayong Trần Văn Nam, ding kơna grŭp pơlir sang anô̆ hmâo anih pơkra rơdêh thut brơi thâo, hơdôm bôh sang anô̆ leng kơ gum hrŏm tui pran jua gơgrong mă pô. Bruă anai pioh pơƀut iâo pơhrui djop mơnuih gum hrŏm hăng dưi lăng kah hăng “hơdôm tơngan tô dlông” mơ̆ng khul pơgang apui ƀong hăng pơtlaih mơnuih. Tui hăng ayong Nam, hơdră djru ƀing mơnuih amăng grŭp hmâo bôh thâo, bôh thâo hăng prăp lui gơnam pioh pơgang apui ƀong, pơgăn mơtăm ƀơi hơdôm hrơi mông hmâo apui ƀong pơphun.

“Ƀing gơmơi dưi prăp lui djop bôh thâo kơ pơgang pơgăn apui ƀong hăng pơtlaih mơnuih hmâo tơlơi truh. Rơngiao kơ anun, dô̆ prăp lui teng leng lăi pơthâo, get pơgang apui, ia, čuah... hăng hơdôm gơnam amuñ ngă apui ƀong pơtuh lĕ khom pioh phara, lơm tơbiă gah rơngiao ƀudah ƀu hmâo pok anom sĭ mơdrô thơ pơdjai hĭ apui kiăng pơhlôm huăi apui ƀong”.

Dong mơ̆ng hơdôm hơdră dưi pơjing ƀơi tơring glông Buôn Đôn hăng hơdôm bôh tơring glông, plơi prong, truh ră anai tơring čar Dak Lak hmâo pơjing laih 303 “Grŭp pơlir sang anô̆ pơhlôm pơgang pơgăn apui”, 71 “Anih pơgang apui ƀong ƀôn ƀut”, hăng 17 “Hơdră pơphun abih bang mơnuih ƀôn sang pơgang pơgăn apui ƀong ƀơi anih mă bruă hơdôm bôh ƀirô, anom bruă hăng kual mơnuih ƀôn sang dô̆”.

Trung tá Phùng Việt Đức – Kơ-iăng Khua Anom tơhan polih pơgang pơgăn apui ƀong hăng pơtlaih mơnuih, djru gum mơ̆ng Kông ang tơring čar Dak Lak brơi thâo, hluai tui hơdôm hơdră, khul apăn bruă pơphun na nao pơhrăm, ngă tui hơdôm jơlan gah pơgang pơgăn apui ƀong amra hmâo amăng bôh nik kiăng mơnuih amăng grŭp gum hrŏm. Mơ̆ng anun, hơdôm mơnuih amăng grŭp amra dưi ngă tui na nao, pơđĭ dlông bruă prăp lui bŏng glăi, lơm hmâo tơlơi truh, pơtuh truh. Trung tá Phùng Việt Đức brơi thâo:

“Hơdôm hrơi pơ̆ anăp ƀing gơmơi čang rơmang lĕ mơnuih ƀôn sang dŏng yua dong, gum hrŏm pơjing dong hơdră “Grŭp pơlir sang anô̆ pơgang pơgăn apui ƀong”. Jơlan gah mơ̆ng ƀing gơmơi lĕ bruă pơgang pơgăn apui ƀong lĕ mơ̆ng abih bang mơnuih ƀôn sang, khul grŭp, gơnam mă yua tui tlôn leng kơ kiăng prăp lui amăng mơnuih ƀôn sang. Ngă hiưm hơpă lơm hmâo apui ƀong, rim mơnuih ƀôn sang lĕ sa ling tơhan pơgang pơgăn apui ƀong, kiăng huăi hmâo apui ƀong lar hyu, apui ƀong prong hrŏ trun răm rai gah mơnuih hăng kông ngăn”.

Bruă pơhư hyu prong hơdôm hơdră “Grŭp pơlir sang anô̆ pơgăng apui ƀong” hăng “Anih pơgang pơgăn apui ƀong ƀôn ƀut” ƀơi tơring čar Dak Lak jing bruă ngă sit nik, djru pơtrut bruă pơhlôm abih bang mơnuih ƀôn sang gum hrŏm pơgang pơgăn apui ƀong tui tơlơi črâo ba mơ̆ng Ding jum Kông ang, biă ñu amăng tơlơi apui ƀong, pơtuh ngă tơnap, ƀu thâo him lăng. Mơ̆ng anun plai ƀiă răm rai gah mơnuih hăng kông ngăn yua kơ apui ƀong ba truh./.