Anom bruă mă jia tơring čar Dak Lak brơi thâo, yap truh blan 10/2022 rơnoh prăk duh jia kơ kơnuk kơna ƀơi tơring čar Dak Lak hơmâo giăm 5000 klai prăk, lu hloh tơhnal pơkă amăng sa thun, đĭ tui 20% pơkă hăng tal anai thun hlâo. Lu rơnoh duh jia đĭ hloh thun hlâo lĕ: Duh jia mơ̆ng sang bruă bơwih ƀong huă sĭ mơdrô gah rơngiao kơnuk kơna, duh jia ƀong prăk blan lu rĭm čô mơnuih hơmâo prăk blan lu, duh jia mă prăk hlâo bruă sĭ mơdrô, blơi gơnam pơprong hăng apah yua lŏn laih anun duh jia sĭ hră lơtri Xổ số.

Boh tơhnal duh jia ƀơi Dak Lak thun anai ăt ƀuh đĭ tui lu bruă, hăng 10/13 boh sang bruă pơhrui lu hloh rơnoh jao thun 2022. amăng anun pơtrut kơtang hơdră wai lăng rơnoh prăk pơhrui glăi mơ̆ng lu sang bruă, pơgăn tơlơi leč ƀu duh jia sĭ mơdrô, hrom hăng anun djru mơnuih duh jia ngă hră čih anăn pơhaih hră pơar pơdjơ̆ nao rơnoh duh jia.