Tui akŏ bruă mrô 60 lơ 18/9, Jơnum min mơnuih ƀôn sang tơring čar Dak Lăk kiăng hơdôm boh tơring pơƀut lăng glăi abih, dăp glăi hăng pơkra djơ̆ mrô djă pioh phun, laih dong hyu pơƀut, pơkra mrô hră pơ-ar mơ̆ng mơnuih ƀôn sang kah hăng Hră yua lŏn, sang dŏ, hră căn cước công dân či pơmut amăng glông djă pioh lŏn tơnah. Tơdơi kơ 1 blan pơphun ngă, bruă pơkra hră lơkak lŏn tơnah hơmâo ngă giong laih ƀơi abih bang 102 boh să; rơbêh 3,4 klăk blah lŏn hơmâo brơi mrô pơkă anăn laih. Khă hnun, tơring čar ăt hơmâo mơn năng ai 520.000 blah lŏn aka ƀu djơ̆ anăn.

Kiăng pơhlôm djơ̆ hrơi pơkă, Jơnum min mơnuih ƀôn sang tơring čar Dak Lăk kiăng hơdôm boh să ječ ameč dưm dăp, jao bruă rơđah rơđông, ngă hrŏm hăng pôr pơthâo pơ plơi pla, kiăng mơnuih ƀôn sang thâo rơđah hăng ba nao hră pơ-ar či pơmut. Bruă pơkra mrô djă pioh lŏn tơnah jing bruă yom biă či akŏ pơdong kơnuk kơna yua boh thâo mrô, abih bang mơnuih mă yua boh thâo mrô, bơwih ƀong mrô, pơđĭ tui bruă bơwih brơi mơnuih ƀôn sang ngă hră pơ-ar, plai ƀiă mơn rơngiă prăk kơ mơnuih ƀôn sang hăng anom bơwih ƀong sĭ mơdrô.