Tơring čar Dak Lak ră anai hơmâo giăm 460 rơbâo hlăk ai mơng 16-30 thun, amăng anun hơmâo rơbêh 116 rơbâo čô hlăk ai djuai ania ƀiă. Mơng thun 2021 truh ră anai, tơring čar hơmâo ĕp brơi bruă mă kơ giăm 61.000 čô hlăk ai; djru brơi rơbêh 10.200 čô hlăk ai dưi čan prăk; pơtô brơi bruă mă kơ rơbêh 1.000 čô hlăk ai glăi mơng ngă tơhan. Amăng mông jơnum, grup hyu mă bruă  hơmâo pơlăi nao rai, pơgôp amăng hơdôm hơdră bruă amăng tơring čar amăng ngă tui tơlơi phiăn hlăk ai hăng hơdôm hơdră pơđĭ kyar hlăk ai amăng thun blan laih rơgao.

Amăng anun đing nao sa, dua boh tơhnal anun lĕ: bruă gum hrŏm mơng Jơnum min mơnuih ƀôn sang tơring čar, hơdôm gơnong bruă, anom bruă hăng hlăk ai; tơlơi gơgrong mơng gong gai djop gưl hăng hlăk ai. Bruă pơtô bruă mă, ĕp brơi bruă mă, djru brơi tơlơi hơdip bơwih ƀong huă kơ hlăk ai tơdơi kơ glăi mơng ngă tơhan. Bruă črâo ba, pơtrut pơsur hlăk ai, đing nao ĕp brơi bruă mă hăng pơphun bruă mă brơi hlăk ai.