VOV4.Jarai-Lơ 18/10, Jơnum min mơnuih ƀôn sang tơring čar Dak Lak ngă hrom Anom wai lăng bruă tuh tia hăng sĭ mơdrô Việt Nam VCCI jơnum Bơkơtuai hơdră jak iâu tuh pơ alin sĭ mơdrô-pơtrut djop sang bruă sĭ mơdrô amăng tơring čar pơđĭ kyar. Ƀơi mông jơnum, ƀing khua mua hơmâo ĕp lăng mrô rơnoh pơtong glăi tơlơi thâo git gai mơ̆ng djop gơnong bruă amăng tơring čar. Laih dơ̆ng bơkơtuai kơ anŏ gêh găl, lông lăng hăng tơring čar Dak Lak amăng bruă pơblih klă bruă jak iâu tuh pơ alin sĭ mơdrô.

Mông jơnum abih bang bơkơtuai hrom

Tui hăng ƀing khua mua lăi, hơdôm thun rơgao tơring čar Dak Lak hơmâo lu tơlơi pơblih phrâo amăng bruă ngă pơ amuñ hloh kơ bruă čih pơkra hơdră tơlơi phiăn hăng jao lŏn tơnah; hơmâo sa yak pơblih phrâo klă hloh pơhrŏ ƀiă prăk apah ƀu sit nik; ngă bơkơnar amăng bruă jak iâu tuh pơ alin sĭ mơdrô; Jơlan hơdră djru kơ sang bruă sĭ mơdrô gêh găl hloh. Khă tui anun, lu khua mua ăt lăi, tơlơi gir run pơblih ƀơi hơdôm tơring glông, anom bruă aka ƀu rơđah ôh, dŏ ngă tŭ kơ hơmâo đôč, aka kiăo tui kơ tơlơi hơmâo sit nik hăng sang bruă sĭ mơdrô; lu hơdră ngă hră pơar tơnap tap lu črăn, pơrơkua nao rai.

Nay Jek: Pơblang