VOV4.Jarai-Rơbêh 10 thun hăng anai, ngă tui hơdră mă yua hăng điện tử anŏ pơkă mrô apui lơtrik yua, Kông ty apui lơtrik Dak Lak hơmâo ngă giong laih anun dưm truă pơblih kông tơr apui lơtrik hăng điện tử, kiăng pơjing atur kjăp kơ bruă pơblih phrâo yua mrô rơnuk phrâo ră anai. Anai lĕ tơlơi gêh găl pioh kơ anom bruă apui lơtrik pơblih phrâo man pơdong apui lơtrik hăng anŏ wai lăng, mă yua rơgơi hloh kơñ pơgi.

Mơ̆ng thun 2011, Kông ty apui lơtrik Dak Lak pơphun dưm truă pơhrua pơblih kông tơr dar hăng măi, jing kông tơr điện tử. Kông tơr anai djru kơ anom bruă apui lơtrik wai lăng mrô apui lơtrik mơnuih ƀôn sang pơkĕ yua amuñ hloh, huăi kiăng mơnuih mă bruă khom nao tơl sang ĕp lăng čih mrô, jŭ yap rĭm blan kah hăng hlâo. Laih dơ̆ng, kơnang kơ internet, ƀing tuai yua apui lơtrik ăt dưi mơ̆n ĕp lăng mă mrô apui lơtrik sang anŏ pô mă yua hơdôm rĭm blan.

Ayong Nguyễn Xuân Thành, dŏ pơ sang mrô 225 jơlan Y Moan, plơi prong Ƀuôn Ma Thuôt, brơi thâo, mơ̆ng hrơi mă yua kông tơr hăng điện tử, sang anŏ gơñu đăo kơnang biă mă anŏ rơgơi phrâo pơkă mrô apui lơtrik tơpă hloh, ăt kah hăng hơđong pran jua ñu hơđong sit pơkĕ yua apui lơtrik. Kơnang kơ ia rơgơi pơdưm amăng telephôn djă hyu, ñu dưi pok ĕp lăng mrô apui lơtrik sang anŏ ñu yua rĭm blan ƀuh rơđah mơtam, ƀơi anŏ rĭm hrơi ƀuh soh mrô apui lơtrik mă yua hơdôm:

“Kâo ƀuh gêh găl biă mă: sa lĕ anŏ tơpă biă; dua lĕ amuñ ĕp lăng mrô apui lơtrik ta mă yua, djru kơ ta pơblih pơkĕ yua apui lơtrik amăng sang anŏ. Bơhmutu bơyan anai hơmâo hơdôm gơnam yua ta lui hĭ jăng jai pơdjai hĭ apui lơtrik kiăng pơkrem ƀiă, ƀudah pơhrŏ mông pơkĕ yua apui lơtrik, djru kơ ta pơkĕ yua apui lơtrik rơnuk rơnua hăng pơkrem hloh”.

Sang anŏ yua apui lơtrik amuñ ĕp lăng tơlơi pơhing mă yua

apui lơtrik amăng măi telephôn

Hăng Kông ty mơnuih ƀôn sang ngă pô Dawa, pơdong ƀơi anih tuh tia pơkra pơjing sa ƀut Tân An, rĭm blan khom tla 80 klăk prăk apah yua apui lơtrik, yă Hồ Thị Lộc, Kơ-iăng Khua kông ty, brơi thâo:

“Mơ̆ng hrơi mă yua anŏ pơdưm amăng măi telephôn djă hyu gah sang bruă apui lơtrik dưm brơi, kâo ƀuh lu tơlơi gêh găl yơh, kah hăng ta ĕp lăng hrơi blan, mông pơkĕ apui lơtrik rĭm hrơi, rĭm blan; dua dơ̆ng lĕ hơmâo tơlơi hơgĕt răm thơ, hlong lăi pơthâo mơ̆ng bơnah tơlơi pơhing anun mơtam huăi tơguan iâu telephôn kơ mrô phun gah anom bruă apui lơtrik ôh. Anŏ pơthâo ia rơgơi anun ăt amuñ mă yua kiăng sem lăng hăng ba tơbiă hră rơnoh apah prăk, ƀuh tŭ yua biă mă kơ sang bruă sĭ mơdrô. Kơnang kơ anŏ pơkă rơgơi anun, tơdah ƀuh mrô apui lơtrik mă yua lu đơi amăng sa hrơi, ta brơi mơnuih gah bruă kơhnăk ĕp lăng, sem glăi hrĕ apui lơtrik hăng măi mok, djru kơ sang bruă tañ thâo hăng pơkrem rơnoh pơkĕ yua apui lơtrik”.

Truh ră anai, bruă mă yua boh thâo ia rơgơi pơkĕ yua apui lơtrik bơwih brơi bruă pơkra ming, sĭ mơdrô,dŏ dong ƀong huă jing sa tơlơi juăt yơh mơ̆ng lu mơnuih hăng sang bruă sĭ mơdrô ƀơi Dak Lak. Hơdôm mrô rơnoh anai, dưi hơmâo kông ty apui lơtrik Dak Lak brơi ĕp lăng amăng plang Web hnai: https://cskh.cpc.vn hăngkơnang kơ anŏ pơkă ĕp lăng ia rơgơi pơdưm amăng măi telephôn, sa hơdră ngă pơƀuh tơlơi tơpă amăng bruă sĭ mơdrô apah yua apui lơtrik kơ tuai, kơ mơnuih ƀôn sang pơkĕ yua.

Hmao wai lăng mă yua apui lơtrik djru kơ sang bruă sĭ mơdrô pơhlôm rơnuk rơnua, pơđĭ tui boh tŭ yua amăng bruă mă pơkra ming

 Ơi Nguyễn Văn Chương, Kơ-iăng Khua sang bruă apui lơtrik Dak Lak, brơi thâo, rơgao 10 thun ngă tui ba yua kông tơr hăng điện tử hăng pok pơhai hơdră čih pioh mrô rơnoh kông tơr mơ̆ng ataih hơmâo djru pơđĭ tui bruă mă wai lăng sĭ mơdrô hăng pơđĭ tui boh tŭ yua bơwih brơi kơ tuai pơkĕ yua apui lơtrik ƀơi Dak Lak. Anai lĕ, tơlơi gêh găl kơ anom bruă ngă tui man pơdong gah bruă apui lơtrik rơgơi kơñ pơgi anai.

“Hăng tơhnal pơkă lĕ gêh găl hloh mă yua apui lơtrik rơgơi amăng hơdôm thun pơ anăp adih ƀơi tơring čar Dak Lak, kông ty ăt hlăk ngă tui anŏ pơblih phrâo kơ tơhnal pơkă anun. Mơ̆ng thun 2016 kông ty hơmâo tuh pơ alin dưm truă măi pok hăng pơthăm apui lơtrik mơ̆ng ataih SCADA tong ten, rơnuk rơnua, laih dơ̆ng anŏ ngă tơ̆i đưn pơkĕ yua lơtrik huăi sui ôh hăng đăo kơnang kjăp hloh. Thun 2014 lĕ kông ty blơi rơdêh pơgiăng hyu bruă hyu pơkra tơl sang, hơgĕt tơlơi truh, anŏ răm ƀăm thơ, nao pơkra ming ƀu tơguan pơthăm apui ôh.

Kông ty hơmâo pok pơhai mă yua hră tla prăk hăng điện  tử mơ̆ng lơ 1/7/2022 pioh bơwih brơi kơ bruă wai lăng hăng duh jia djơ̆ lăp, tañ giong ba yua pơblih mrô mơ̆ng Kơnuk kơna pơtrun”.

Truh plah wah thun anai, Dak Lak hơmâo dưm truă kông tơr apui lơtrik hăng điện tử, brơi rơbêh 580 rơbâo boh sang, ngă giong truh 96% mrô pơkă. PC Dak Lak khut khăt ngă giong brơi pơhrua abih bang kông tơr hăng điện tử laih anun čih pioh mrô rơnoh mơ̆ng măi jŭ yap mă hơjăn amăng thun 2022 anai. Hăng hơdră ngă tui boh thâo ia rơgơi phrâo, kông ty kơtưn ba yua boh thâo ia rơgơi pơkra ming, dăng hrĕ apui lơtrik, dưm truă măi pơkĕ hăng jŭ yap apui lơtrik hăng điện tử soh.

Anom bruă apui lơtrik Dak Lak ăt man pơdong mă yua lu boh thâo ia rơgơi phrâo kiăng mă bruă klă hloh, kah hăng lăi lui hlâo hnong pơkĕ lơtrik, pơhŭi hlâo tơdah hơmâo anŏ răm brơi tuai yua apui lơtrik ƀuh lơ̆m hlăk mă yua apui lơtrik đah mơ̆ng hmao bĕ hĭ tơlơi truh čih hơmâo.

Nay Jek: Pơblang