Plah wah amăng blan 11, ơi Tạ Hồng Triều, dŏ ƀơi ƀut plơi mrô 10, phường Ƀuôn Ma Thuôt, nao pơ anih ngă hră pơar brơi mơnuih ƀôn sang ƀơi phường, kiăng ngă hră pơar čih pơkra glăi anăn, phung hăng boh hrăm pơtlep hăng anăn kiăng djơ̆ hăng hră pơhaih thun tơkeng kơ ană tơluĭ ñu, hlâo adih čih soh glăi, anai ană ñu prăp či nao hrăm gưl prong. Ơi Triều kah pơpha, mah blung a dŏ sư̆ rơbư̆, samơ̆ yua hơmâo ƀing apăn bruă amăng Grup ƀơi sa bah amăng pơtô, pơčrâo brơi hơdră čih pơmut anăn, anun djop bruă dưi pơsir hĭ tañ aka truh 10 mơnit ôh.

“Ră anai rai ngă glăi hră pơar, hơmâo ƀing neh anun mă bruă ƀơi sa bah amăng pơtô ba ƀuh amuñ amĕ yơh kơnong ĕp lăng sa pok hră pơhaih thun tơkeng đôč, čih pơkra glăi boh hră soh, laih anun ta čih pơhaih glăi tơlơi pơhing hăng pơmut nao dơ̆ng. Mơnuih apăn bruă ƀơi sa bah amăng lăi giong yơh, glăi pơ sang tơguan boh tơhnal arăng mơ-it nao, hră pơar tui jơlan sang dăng kông djă ba brơi truh pơ sang, tui anun gêh găl biă mă”.

Ngă hră pơar čih anăn pơhaih pơdŏ rơkơi bơnai ƀơi sang bruă ngă hră pơar kơnuk kơna phường Ƀuôn Ma Thuôt mơ̆n, ayong Phan Thế Hưng hăng amai Nguyễn Diễm Quỳnh kah pơpha, yua hơmâo čih anăn mơit online hlâo kơ anun laih, lơ̆m truh pơ anih ngă hră pơar ƀơi sa bah amăng, arăng ngă hră pơar hmar biă mă, tañ, hơbôt hyôt. Hơdôm bruă pơblih ngă hră pơar hơmâo pơtô ba amăng online soh, tŭ mă hră pơar, truh pơ anih ngă hră pơar, ƀing apăn bruă tŭ mă hră pơar hăng pơblih hơdră mă bruă, tơlơi pơmin ta ƀuh phara biă mă, wai lăng đôč hlâo adih, ră anai, bơwih brơi kơ ană plơi pla mơak biă mă.

“Hnang blung kâo ƀuh khom ngă hră pơar čih hăng gai čih laih anun pơsir hăng tơlơi pơhing mơit online tui măi phôn djă hyu, ăt sư̆ rơbư̆ mơ̆n. Anai lĕ, anŏ phrâo hloh, ƀuh tơlơi mă bruă, bơwih brơi kơ mơnuih ƀôn sang tañ, hmar hloh”.

Phường Ƀuôn Ma Thuôt, tơring čar Dak Lak dưi pơmut hrŏm mơ̆ng hơdôm phường Thành Công, Tân Tiến, Tân Thành, Tự An, Tân Lợi hăng să Čư̆ Êbur gah plơi prong Ƀuôn Ma Thuôt hơđăp, hăng 170.000 čô mơnuih ƀôn sang. Yă Trần Thị Minh Thủy, mơnuih ngă bruă ƀơi Grup sa bah amăng Sang bruă ngă hră pơar kơnuk kơna phường Ƀuôn Ma Thuôt, brơi thâo, rĭm hrơi hơmâo năng ai mơ̆ng 130-160 wơ̆t mơnuih ƀôn sang nao ngă hră pơar. Kiăng pơsir hơdôm hră pơar anun prong biă mă, sang bruă pơpha dua grup khua mua, mơnuih apăn bruă ngă brơi har pơar, ngă bruă amăng lăm anih hăng gah rơngiao anih mă bruă, truh pơ lan sang bruă. Mơnuih ƀôn sang hmư̆ hơdră pơtô brơi hmao kru anun dưi pơkrem hrơi mông, ngă tui:

“Dua grup, rĭm grup hơmâo 6 čô mơnuih djru ba mơnuih ƀôn sang. grup gah rơngiao ƀơi lan sang bruă lĕ djru mơnuih ƀôn sang pơmut anăn online; grup amăng lăm lĕ tŭ mă hră pơar hăng pơsir brơi hră pơar. Lu biă mă djru ba mơnuih tha rơma đôč laih anun ƀing ƀu klă drơi jăn, dŏ glăi ƀing hlăk ai ƀiă, thâo yua ia rơgơi mrô amăng phôn, gơñu ngă mă pô hăng pơmut anăn”.

Rơnoh jŭ yap mơ̆ng Jơnum min mơnuih ƀôn sang tơring čar Dak Lak, mơ̆ng lơ 1/7 truh abih blan 10, đơ đam tơring čar hơmâo tŭ mă 481.000 pok hră pơar rơkâo pơsir mơ-it amăng plang internet ngă hră pơar ƀơi dêh čar, glông bruă pơsir hră pơar phun ƀơi tơring čar hăng mơ̆ng djop gơnong bruă, anom bruă hrŏm hăng 102 boh să, phường. Amăng mrô anai, hơmâo rơbêh 437.000 pok hră pơar dưi ngă giong, pơsỉ abih 91%. Tơdơi kơ pơmut hĭ, kơnuk kơna dua gưl mă bruă hơđong tui, pơsir hră pơar brơi kơ mơnuih ƀôn sang hruaih. Rơnoh pơkă ngă mơak pran jua mơnuih ƀôn sang hăng ƀing ngă bruă mơdrô, pơsir tui hăng tơlơi lăi pơthâo, tơlơi rơkâo abih 100%, bơ bruă tŭ mă hră pơar hăng pơsir hră pơar mơnuih ƀôn sang ngă giong giăm 91%, dưi pơtong glăi lĕ, ngă lăp laih pơkă hăng rơnoh pơkă amăng đơ đam dêh čar. Ơi Đỗ Đức Hà, Kơ-iăng khua Gơnong bruă Tơlơi phiăn tơring čar Dak Lak, brơi thâo, kiăng pơđĭ tui boh tŭ yua pơsir hră pơar mơnuih ƀôn sang, hrŏm hăng bruă pơđĭ tui tơlơi thâo mă bruă kơ ƀing khua mua, mơnuih apăn bruă, tơring čar kiăng akŏ pơjing anih čih pioh răk lui mrô rơnoh jŭ yap pơtruh nao rai mơ̆ng tơring čar trun pơ să dưi thâo hrŏm hơbit. Ơi Đỗ Đức Hà lăi pơthâo jơlan hơdră pơsir:

“Djop sang bruă pơdjơ̆ nao khom hơmâo sa anih djă pioh mrô rơnoh ĕp lăng hrŏm abih bang, laih anun mơ̆ng anih dưm mrô anun kiăng pơkra hơdră boh thâo ia rơgơi, juăt lăi phần mềm djă pioh tơlơi pơhing pioh pơtruh nao rai hăng abih bang tơlơi pơhing amăng bruă ngă hră pơar amăng kơnuk kơna wai lăng. Mơ̆ng anun, mơnuih ƀôn sang hăng ƀing ngă bruă mơdrô amra hơmâo djop tơlơi pơhing kiăng ĕp lăng, mă yua hăng ngă tui djop bruă ngă hră pơar či kiăng mơ̆ng gơñu. Hrŏm hăng anun, anom bruă kơnuk kơna ăt khom hơmâo tơlơi pơhing anai pioh pơsir bruă ngă hră pơar tui hăng tơlơi či kiăng mơ̆ng mơnuih ƀôn sang hăng ƀing ngă bruă mơdrô”.

Dak Lak tơdơi pơmut hrŏm lu sang bruă hơmâo mrô mơnuih ƀôn sang năng ai 3,64 klăk čô mơnuih hăng 102 boh sang bruă gưl să. Hăng anŏ yom phara, lŏn rơhaih, jơlan ataih nao rai amăng tơring čar, mơnuih ƀôn sang dŏ hui, bruă pơsir hră pơar kơnuk kơna wai lăng mơnuih ƀôn sang lu hăng tơnap tui anun, sa tơlơi gir run prong biă mă mơ̆ng ƀing khua mua, mơnuih apăn bruă hăng mơnuih mă bruă apah sang bruă kơnuk kơna. Boh tơhnal anai brơi ƀuh, bruă pơblih yua mrô tui atur git gai kơnuk kơna tơbiă mơ̆ng tơlơi pơmin, pơphô amăng bruă mă “wai lăng” jing pran jua mă bruă bơwih brơi tui anăp kơnuk kơna dêh čar pơtrun, amăng thun blan tơdơi kơ pơmut glăi.