H’Hương Hwing, djuai ania Êđê, dŏ pơ Ƀuôn Mlôč, să Krông Jĭng, tơring glông Mdrak, tơring čar Dak Lak lu thun na nao mơtam arăng đăo kơnang ruah ñu ngă khua ping gah plơi. Hrŏm hăng bruă pơtô lăi, jak iâu mơnuih ƀôn sang ngă tui klă jơlan hơdră, tơlơi pơtrun mơ̆ng ping gah hăng kơnuk kơna, H’Hương dŏ jing mơnuih ba gru hlâo amăng bruă ba yua pơblih pơjeh djuai phun pla, hlô mơnong rông, pơđĭ kyar bơwih ƀong huă sang anŏ gŏ awă. H’Hương lăi, yua ngă hrŏm nao pơhmư̆ hơdră arăng pơtô pơđĭ tui boh tŭ yua bruă mă kơ mơnuih ping gah amăng plơi pla djuai ƀiă, ñu hơmâo hrăm lu tơlơi pơtô hiam klă, ngă tui sit nik amăng bruă mă mơ̆ng ñu.

“Bruă mă kiăng lui rơmŏn kŏn rin amăng plơi pla lĕ sa bruă yôm biă mă, Plơi pla pok pơhai ngă tui hră pơtrun mơ̆ng ping gah, git gai, jĕ giăm mơnuih ƀôn sang, pơtô brơi hơdră pơđĭ kyar bơwih ƀong huă, ba yua boh thâo ia rơgơi čem rông hlô mơnong, un mơnŭ, rơmô kơbao. Thâo tong ten thun blan bơyan ngă bruă, rah pơtem, tơjŭ pla hmua pơdai anun hơmâo djru kơ plơi pla ƀrư̆ hrơi abih tơlơi rơmŏn rơpa”.

Yua thâo tong ten tơlơi hơdip mơda, tơlơi phiăn juăt mơnuih ƀôn sang pô, hăng bruă khin ngă, khin pơblih, tŭ tơlơi glăm ba prong, mơnuih apăn bruă ping gah jing mơnuih djuai ƀiă hơmâo ngă klă bruă jao. Mơ̆ng anun, djru hrŏm pơgang hơđong tơlơi rơnuk rơnua amăng plơi pla, pơtrut bruă ngă lui rơmŏn kŏn rin, pơđĭ kyar bơwih ƀong huă mơnuih mơnam ƀơi plơi pla. Ơi Trần Hồng Tiến, Khua git gai ping gah tơring glông Krông Pač lăi:

“Hăng ƀing apăn bruă lĕ ƀing gơmơi ruah mă ƀing hlăk ai, mơnuih djuai ƀiă dŏ pơ kual plơi pla thâo thăi lu, brơi apăn bruă ngă khua kơ plơi pla, ƀuh rơđah lơ̆m thun blan lăng tui bruă mă, gơmơi pơtong sit, ƀing gơñu hơmâo ngă giong bruă jao soh laih anun tơlơi đăo kơnang mơ̆ng mơnuih ƀôn sang”.

Amăng tar ƀar tơring čar Dak Lak ră anai, mrô khua mua, mơnuih apăn bruă lĕ mơnuih djuai ƀiă hơmâo 13%. Nai prin tha Nguyễn Thành Dũng, Khua sang hră kơđi čar Dak Lak brơi thâo, mơnuih apăn bruă ngă khua kơnuk kơna jing mơnuih djuai ƀiă lêng kơ hơmâo pơtô hrăm tơlơi thâo djơ̆ hnong pơkă kơ bruă mă hăng tơlơi thâo amăng bruă kơđi čar:

“Amăng 10 thun rơgao, mrô mơnuih hrăm rơbêh 25.000 čô, amăng anun, mrô mơnuih hrăm jing mơnuih djuai ƀiă lĕ rơbêh 4.500 čô. Anai lĕ boh tơhnal sang hră pơtô hrăm, djru pơgôp brơi mrô mơnuih ngă khua apăn bruă thâo rơgơi kơ djop gưl ping gah amăng tơring čar, djop sang bruă kiăng hơmâo mơnuih mă bruă thâo rơgơi hloh”.

Tui hăng ơi Lê Nam Cao, Kơ-iăng Khua anom pơphun bruă mă Ping gah tơring čar Dak Lak, pơtong glăi bruă akŏ pơdong, pơđĭ tui mrô mơnuih apăn bruă, ngă khua, mơnuih ping gah jing mơnuih djuai ƀiă sa bruă mă yôm hloh amăng bruă dăp mơnuih mă bruă tơring čar, kiăo tui djơ̆ boh yôm phun hră pơtrun jơnum ruah khua ping gah dêh čar tal XIII hăng hră pơtrun ping gah tơring čar, pok pơhai sa amăng plĕ lir hơbit hăng bruă čih pơkra hră pơtrun, tơlơi pơkă djơ̆ găl. Tơlơi anai, hơmâo pơjing rai pran kơtang, ngă tui tơhnal pơkă akŏ pơdong bruă mă kơ mơnuih apăn bruă, mơnuih ngă khua jing mơnuih djuai ƀiă. Ơi Lê Nam Cao brơi thâo:

“Dăp bruă kơ djop anih ngă bruă amăng glông bruă kơđi čar amăng anun đing nao kơ hơdôm bruă mă yôm phun kiăng mơnuih apăn bruă djuai ƀiă khom iâu pơmut mơnuih apăn bruă jing djuai ƀiă. Tơring čar ăt ngă tui lu jơlan hơdră mơ-it nao pơtô hrăm brơi ană bă mơnuih djuai ƀiă hrăm bruă”.

Tui hăng Hră pơtrun mơ̆ng ping gah tơring čar Dak Lak tal 17, rơwang bruă thun 2020-2025, bruă mă dăp hơdră pơđĭ khua, mơnuih ping gah jing djuai ƀiă ăt dŏ đing nao soh đôč. Tơring čar kơtưn gir truh thun 2025, mrô mơnuih apăn bruă ping gah, mơnuih ngă khua, jing mơnuih djuai ƀiă amăng mrô abih bang apăn bruă ngă khua sang bruă kơnuk kơna amăng tơring čar Dak Lak khom hơmâo 15% pơngŏ adih.