Amăng thun 2023, Sang bruă apui lơtritk Dak Lak hmâo pơsir pŏ rơguăt rơbêh kơ 30km jơlan hrĕ dăng kông ƀơi hơdôm kual gah tơring glông Krông Pač, Ƀuôn Đôn, Čư̆ Kuiñ, Krông Ana, Ea Sup, Krông Bông, Lak hăng Čư̆ Mgar. Pơplih pơkra dong hrĕ dăng kông, biă ñu pơsir hơdôm anih ƀu pơhlôm, amra ba truh tơlơi apui lơtrik apui ƀong, Sang bruă apui lơtrik Dak Lak hmâo pơjing laih grŭp Zalo "Mă yua măi mok” hăng rơbêh kơ 50 čô mơnuih hmâo khua git gai gơnong bruă apui, khua 6 bôh anom dăng kông, mơnuih mă bruă wai lăng hrĕ dăng kông, mơnuih wai lăng glông hrĕ.

Rim hrơi, grŭp tŭ mă tơlơi pơhing, rŭp čơphin hmâo pơsit anih anom lom hmâo tơlơi truh kơ yôl hrĕ dăng kông gŏng hrĕ, tŭ ư hrŏm hrơi mông pơsir hăng bruă pơsit rơđah glông hrĕ mơ̆ng anom hơpă tơdơi kơ anun amra pơhrui glăi, trơ̆i rơguăt, pŏ rơguăt. Khă phrâo pơjing, samơ̆ grŭp Zalo "Anom mă bruă măi mok" hmâo djru pơsir tañ bruă mă, bĕ trơ̆i hual hrĕ kap bơdjơ̆ nao jơlan internet. Pơ̆ anăp anai, PC Dak Lak djă pioh dong grŭp Zalo hăng pok prong dong lu ding kơna gah Gơnong bruă wai lăng tơlơi pơhing hăng pôr pơhing, Anom bơwih ƀong anom mă yua hơdôm bôh tơring glông, plơi prong, Sang bruă wai lăng phun kyâo pơtâo, pơčrang rơđah plơi prong..., kiăng pơsir bruă mă amuñ hloh, gêh gal hloh. Tơlơi anai kiăng kơtưn gum hrŏm kơplah wah hơdôm bôh anom, pơhlôm tơhnal ha sa amăng hơdôm tơlơi pơplih pơkra plơi prong, pơsir pŏ hrĕ dăng kông, trơ̆i than phun kyâo... mơ̆ huăi bơdjơ̆ nao bruă pơkĕ apui lơtrik, jơlan dăng apui mơ̆ng hơdôm glông internet./.