Man pơdong, pơkra ming, blơi prăp gơnam yua mă bruă, pơtô hrăm, anih hrăm pơhrua djop kiăng bơwih brơi  bruă pơtô hrăm kơ thun hrăm phrâo kiăng čơđai sang hră hơđong pran jua hloh. Hương Lý pô čih tơlơi pơhing dŏ ƀơi kual Dap Kơdư  ră ruai.

Thun hrăm 2023-2024, sang hră gưl sa, gưl dua Lê Duẩn, să Ea Puč, tơring glông Krông Năng hơmâo 710 čô čơđai sang hră dua gưl hrăm. Dơ̆ng mơ̆ng plah wah blan 8, sang hră ngă giong laih bruă čih anăn čơđai mut thun hrăm phrâo, pơtô hrăm brơi hlâo kơ ƀing nai pơtô djop anih, dua gưl, biă mă ñu nai pơtô anih 4 hăng anih 8 tui hơdră hrăm phrâo, hơdrôm hră pơtô hrăm phrâo thun 2018. Laih dơ̆ng, blơi prăp djop gơnam yua pioh pơtô hăng hrăm, pơphun rơmet sang hră, pơhrôp glăi anih hrăm, sang hră, tơdron ngui, đang war, phun kyâo pơtâo, đang bơnga ngă pơhiam lan sang hră thun hrăm phrâo. Nai Nguyễn Duy Nghĩa, Khua sang hră lăi:

“Sang hră hơmâo ming pơkra glăi phrâo anih hrăm, rơmet rơgoh sang juă glai, kih rơmet lan sang hră, pơhrua pul apui lơtrik hăng blơi prăp gơnam yua pơtô hrăm gưl phun phrâo kơ anih 4 hăng anih 8. Dŏ glăi hơdră pơtô anih 5 hăng anih 9 lĕ ăt pơtô tui hơdră hơdrôm hră hơđăp, gơnam yua amăng sang hră djop laih mơ̆n”.

Hrŏm hăng ming pơkra glăi, pơđĭ tui hơdôm črăn bruă anet, lu plơi pla tơring glông amăng tơring čar hơmâo ba yua ngăn rơnoh hơdôm hơpluh klai prăk kơ sang hră pioh man pơdong, pơkra glăi anih hrăm phrâo, rơmet glăi đang sang hră, phun kyâo pơtâo, war pơga, anih ƀing nai dŏ hăng mă bruă. Ƀuh rơđah kah hăng ƀơi tơring glông Čư̆ Mgar, thun hrăm anai, tơring glông mă yua ngăn rơnoh abih tih 33 klai 500 klăk prăk tuh pơ alin kơ bruă blơi gơnam pơhrua pơtô hrăm kơ djop sang hră. Truh ră anai, gơnam yua pioh pơtô hrăm djop ƀiă laih tui hơdră pơtô pơhrăm phrâo. Ơi Nguyễn Tự Do, Khua anom bruă Pơtô hăng Pơjuăt tơring glông Čư̆ Mgar lăi pơthâo:

“Anom bruă Pơtô hrăm tơring glông Čư̆ Mgar, hơmâo git gai djop sang hră lăi pơthâo hăng gong gai kơnuk kơna či plơi, jơnum min mơnuih ƀôn sang tơring glông pơhrua ngăn rơnoh blơi prăp kơ djop sang hră pioh ba yua pơtô hrăm djơ̆ hăng tơlơi pơtrun mơ̆ng Ding jum Pơtô hăng Pơjuăt ngă tui hơdră pơtô hrăm phrâo gưl phun dêh čar ta čih pơkra mơ̆ng thun 2018 hăng hơdră pơtô hrăm tui hơdră hlăk ngă ră anai, pơhlôm brơi djop sang hră yak mut thun hrăm phrâo djop hăng hơđong”.

Thun hrăm 2023-2024, tơring čar Dak Lak hơmâo rơbêh 1000 boh sang hră pơtô hrăm hră mơ̆ng gưl muai "mầm non" truh abih anih 12 jing gưl klâo. Hlâo kơ truh thun hrăm phrâo, tơring čar Dak Lak git gai anom bruă Pơtô hrăm pok anih pơtô kơ nai pơtô thâo hlâo hơdră či pơtô hrăm kơ ƀing nai, ƀing ngă bruă amăng sang hră, gơnong bruă pơtô hrăm, ĕp lăng ngă bơkơnar mrô nai pơtô,  kiăng huăi hơmâo anih rơbêh, anih kơƀah, ngă tui djơ̆ hơdră pơtô hrăm gưl phun thun 2018. Thun hrăm anai, abih amăng bruă tuh pơ alin 965 klai prăk pioh man pơdong phrâo, ming pơkra glăi, blơi prăp gơnam yua pơtô hrăm. Yă Lê Thị Kim Oanh, Kơ-iăng Khua Gơnong bruă Pơtô hăng Pơjuăt tơring čar  Dak Lak brơi thâo:

“Ƀuh djop sang hră yua gơnong bruă Pơtô hăng pơjuăt wai lăng truh ră anai djop laih gơnam yua mă bruă pơtô hrăm ăt kah hăng gơnam yua phrâo bơwih brơi bruă pơtô hrăm tui hơdră phrâo dêh čar čih pơkra mơ̆ng thun 2018. Rơngiao kơ anun, djop sang hră mơ̆ng gưl muai, sang hră gưl sa, gưl dua hơmâo pơpha brơi truh pơ djop tơring glông, samơ̆ Gơnong bruă pơtô hrăm tơring čar ăt pơtrun hiăp kơ anom bruă pơtô hăng pơjuăt tơring glông prăp lui jŭ yap djop anŏ gêh kiăng pơtô hrăm mơ̆ng anun lăi pơthâo hăng jơnum min mơnuih ƀôn sang tơring glông kah pơpha ngăn rơnoh kiăng blơi prăp anŏ kiăng djop pơtô hrăm kơ thun hrăm phrâo”.

Ăt tui hăng tơlơi lăi pơthâo mơ̆ng Gơnong bruă Pơtô hăng Pơjuăt tơring čar Dak Lak thun hrăm laih rơgao, đơ đam tơring čar hơmâo 30 rơbâo čô čơđai sang hră hrăm abih anih 9. Amăng anun, rơbêh 23.100 čô djop puang dưi mut hrăm anih 10 jing gưl klâo, rơbêh 4.000 čô čơđai sang hră djơ̆ anăn mut hrăm anih 10 samơ̆ ƀu djop sang hră phun, khom hrăm amăng sang hră pơtô re se giáo dục thường xuyên, sang hră pơtô hrăm bruă mă. Mrô dŏ glăi 2.400 čô lĕ aka ƀu hơmâo sang hră či mut hrăm anih 10. Kiăng pơsir tơlơi anai, Jơnum min mơnuih ƀôn sang tơring čar Dak Lak pơtrun hiăp kơ Gơnong bruă Pơtô hăng Pơjuăt ăt khom jŭ yap glăi mrô čơđai sang hră mut hrăm gưl klâo, kiăng pơmut hrăm djop tơlơi kiăng. Laih dơ̆ng, jŭ yap glăi tong ten mrô čơđai sang hră ƀơi sang hră pơtô hrăm re se kiăng abih bang ƀing čơđai dưi hơmâo djop sang hră hrăm. Djop sang hră đing nao pơhrua djop ngăn rơnoh pơhlôm brơi djop blơi prăp gơnam yua pơtô hrăm, jak iâu ƀing nai pơtô, apah nai pơtô kơ djop sang hră hrăm  re se, pơtô hrăm bruă kiăng djop gơnam yua pơtô pơhrăm kơ čơđai sang hră thun hrăm phrâo