Ƀơi hơdôm anih man pơdong, Khua git gai Ping gah tơring čar ơi Lương Nguyễn Minh Triết tơña bla, juh alum pran jua, pơpŭ ƀing kông ñơn, ƀing kĭ sư ƀơi hơdôm anih man pơdong sang hră thun phrâo hơmâo lu hiam drơi jăn, yâo mơ-ak, mă bruă rơnuk rơnua, tŭ yua. Laih dong tŭ yap, pơpŭ pran glăm ba, tơlơi gir run găn rơgao tơnap tap mơng hơdôm anom bruă man pơdong.

Khua git gai Ping gah tơring čar Dak Lak čang rơmang hơdôm anom bruă tŏ tui pran gum pơgôp, tơlơi glăm ba, gir run; pơphun bruă man pơdong rơnuk rơnua, djơ̆ hrơi mông, kjăp hăng hiam hloh. Tui anom bruă tuh pơ alin, truh ră anai, 3 akŏ bruă man pơdong sang hră kơnuk kơna čem rông ba pơlir gưl I hăng II ƀơi hơdôm boh să Ƀuôn Đôn, Ia Rve hăng Ia Lốp lêng kơ ngă klă hăng rơgao hrơi mông pơkă kiăng dưi čơkă čơđai mut hrăm amăng thun hrăm pơ anăp.