Truh mông anai mơnuih pla sầu riêng ƀơi Dak Lak glăk yak mut bơyan pĕ bôh sầu riêng. Rim hrơi hmâo hơdôm rơtuh bôh rơdêh container pơprong hăng lu djuai rơdêh pơgiăng gơnam tam, rơdêh thek, rơdêh thut, ba gak... pơgiăng sầu riêng rô nao rai ƀơi hơdôm ară jơlan ba nao sĭ. Khul apăn wai lăng bruă dŭ pơgiăng pơtrut kơtang hyu tir, wai lăng, kiăng pơhlôm hơđong ƀơi jơlan nao rai.

Kiăng pơhlôm hơđong ƀơi jơlan nao rai, grŭp tơhan polih hmâo pơpha laih abih bang mrô mơnuih hyu tir wai lăng ƀu pioh hmâo tơlơi truh gun jơlan nao rai, tơlơi truh pơjrom; hrŏm hăng anun rơkâo hơdôm mơnuih mơgăt rơdêh container kĭ pơkôl ngă tui tơpă tơlơi phiăn nao rai, ƀu pơgiăng rơgao rơnoh pơkă, đuăi hmar, blăi ča... Tơring čar Dak Lak hmâo rơbêh kơ 22.500 ektar đang sầu riêng, lu ñu ƀơi hơdôm bôh tơring glông Čư̆ Mgar, Čư̆ Kuiñ, Ea Kar, Krông Ƀuk, Krông Năng, Krông Pač, Ea Hleo hăng plơi prong Buôn Hồ. Amăng anun, rơbêh kơ 10.000 ektar glăk pĕ pơhrui bôh laih, mrô ñu thun 2023 anai him lăng hmâo 185.000 tơn bôh sầu riêng./.