Ơi Y Bhăng Mlô, ƀơi să Ea Tul, tơring glông Čư̆ Mgar hmâo 1,5 ektar đang kơphê glăk amăng rơwang hmâo bôh ƀơi kual rơnuč ƀôn Sah A, giăm hăng să Čư̆ Dliê M’nông. Anai lĕ kual ƀiă mơnuih nao rai, ataih mơ̆ng anih anom mơnuih ƀôn sang dô̆, hơdôm thun hlâo adih juăt hmâo tơlơi rơngiă kơphê arăng klĕ. Ñu lăi pơthâo, thâo kơ hơdôm thun hlâo adih, thun anai hơdôm bôh sang anô̆ hmâo kơphê ƀơi kual anai hmâo gơgrong hlâo gum hrŏm hăng kông ang să pơjing anih gak wai rô hyu pơgang đang kơphê. Rim hrơi dô̆ gak leng kơ pơphun hyu tir, pơgang kơphê ƀơi đang biă ñu amăng mlăm mơmot. Yua anun, tơlơi rơngiă kơphê arăng klĕ dop ƀu dô̆ hmâo kah hăng hlâo dong tah. Ơi Y Bhăng Mlô lăi:

 “Ƀơi anih kâo dô̆ gak hmâo 2 čô mơnuih ƀôn sang gum hrŏm hăng khul kông ang să, truh mơmot lĕ adơi ayong hyu tir kual giăm hăng să Čư̆ Dliê M’nông hăng să Ea Tul hyu tir gak mơ̆ng mơmot truh kơ 9 mông laih anun pơdơi ƀiă hăng 11h ƀudah 11h30’ mlăm glăi hyu tir hăng truh kơ mơguah 1h-2h kah hăng mơ̆ng glăi. Hơdôm mơnuih klĕ dop ƀuh adơi ayong gak hăng gak ha mlăm gơñu huĭ ƀu khin mut amăng đang klĕ dop dong tah”.

Ea Tul lĕ să hmâo lŏn pla kơphê prong hloh tơring glông Čư̆ Mgar hăng rơbêh kơ 2.000 ektar. Thiếu tá Đặng Trọng Minh – Khua Kông ang să lăi pơhing, să hmâo 10 bôh ƀôn hăng sa bôh plơi. Hơdôm bôh plơi, ƀôn ră anai leng kơ hmâo dưm camera lăng tui hăng tơlơi rơnuk rơnua pơhlôm hơđong. Khă hnun hai, hơdôm thun hlâo adih, ƀơi anai ăt hmâo mơn hơdôm tơlơi klĕ dop kơphê ƀơi sang, biă ñu hơdôm kual ataih mơ̆ng anih mơnuih ƀôn sang dô̆. Ƀơi anăp tơlơi anai, kông ang să hmâo pơphô brơi laih Ping gah să pơdŏng hơdôm anih gak wai pơphun hyu tir pơgang kơphê kơ mơnuih ƀôn sang amăng hơdôm hrơi kơphê tơsă. Thiếu tá Đặng Trọng Minh lăi:

 “Ƀing gơmơi pơdŏng mơ̆ng 3-4 bôh anih gak wai, rim anih mơ̆ng 3-5 čô mơnuih, dô̆ gak ƀơi hơdôm kual hmâo đang kơphê, ƀudah ƀơi hơdôm anih mơnuih ƀôn sang lăi pơthâo rơngiă, anun lĕ hơdôm kual phrâo hmâo rơngiă kơphê lĕ khul amra ƀuh ƀô̆ pơsir mơtăm. Bruă mă mơ̆ng kông ang lĕ phun, hăng dô̆ hmâo dong hơdôm grŭp, khul amăng să kah hăng Mơnuih pơ ala kơ tơhan plơi să, khul hlăk ai, khul mơnuih ngă đang hmua, ling tơhan hơđăp, jơnum min djop djuai ania mơnuih mơnam hăng wot mơnuih ƀôn sang hmâo kơphê gum hrŏm dô̆ gak pơgang kơphê kơ neh wa".

Bơyan 2023-2024, đơ đam tơring čar Dak Lak hmâo giăm truh 213.000 ektar đang kơphê, hơnong ñu yap him lăng mơ̆ng 2,6 – 2,8 tơn sa ektar, abih bang hmâo năng ai ñu 550.000 tơn, pĕ pơhrui na nao truh krah blan 1 thun 2024. Rơwang anai amra hmâo năng ai ñu 200.000 čô mơnuih mă bruă ƀơi hơdôm bôh tơring car gah Kơdư, kual Tŏng Krah dêh čar... nao Dak Lak hyu mă bruă pĕ kơphê. Yua kơ mrô mơnuih đĭ lu, biă ñu ƀiă hrơi, tơlơi hơđong plơi pla amra glêh tơnap.

Thượng tá Phan Thanh Cường – Khua Anom pơsir kơđi tơlơi Kông ang tơring čar Dak Lak brơi thâo, ngă tui tơlơi črâo ba mơ̆ng Kông ang tơring čar Dak Lak kơ pơgang hlôm hlâo ƀing ngă soh phă pơrai ƀudah klĕ dŏp kơphê bơyan thun anai, anom hmâo pơphô brơi laih kơ kông ang tơring čar pok pơhai ha amăng plĕ hơdôm bruă pơsir kah hăng: Gum hrŏm hăng kông ang hơdôm bôh tơring glông, plơi prong wai lăng klă mơnuih đing đăo ƀơi anih pô mă bruă ƀu pioh hmâo tơlơi ngă soh; rơkâo mơnuih pơ ala hơdôm anih anom blơi sĭ gơnam mă mơ̆ng đang hmua amăng tơring čar ƀu pơhrui blơi kơphê dô̆ mơtah, kơphê ƀu rơđah phun akha yua ƀing klĕ dop ba nao sĭ; lăi pơhing pơsur mơnuih ƀôn sang kơđiăng, gơgrong klă, ƀom ƀing ngă soh pioh pơhlôm pơgang mơ̆ng ataih, gum hrŏm hăng hơdôm grŭp gơnong bruă tơring glông, plơi prong pơphun hyu tir pơgang kông ngăn mơnuih ƀôn sang... Thượng tá Phan Thanh Cường lăi pơthâo sa dua bruă mă phun mơ̆ng anom amăng bruă pơgang ngă kơtuă ƀing ngă soh amăng bơyan pĕ kơphê thun anai (2023-2024).

 “Anom bruă pơsir kơđi tơlơi hmâo gơgrong hlâo pơdŏng kơčăo bruă amra đing nao pel ĕp abih bang mrô mơnuih mă bruă mơ̆ng hơdôm tơring čar pơkon nao mă bruă apah pioh wai lăng, pơgang hlôm hlâo mơ̆ng ataih ƀu pioh mơnuih ngă soh ngă bruă gơñu, klĕ dŏp kông ngăn ƀudah pơrai kông ngăn. Mơ̆ng anun pơhlôm hơđong rơnuk rơnua, pioh mơnuih ƀôn sang hơđong pran jua ngă đang hmua pĕ pơhrui kơphê bơyan 2023-2024 anai”./.