Mah hơmâo sa, dua rơnoh prăk duh jua pơhlôm hăng rơgao hơnong pơkă, samơ̆ amăng tơring čar dŏ lu rơnoh prăk pơhrui hrŏ trun kơtang pơhmu tui tơđar thun hlâo, hơmâo: pơhrui prăk mă yua lŏn mơnai, mă jia mơng hơdôm kual bơwih ƀong sĭ mơdrô kơnuk kơna, jia wai pơgang anih dŏ jum dar, jia mơng prăk apah rĭm akŏ mơnuih…

Ƀơi anăp kơ tơlơi anai, ơi Bùi Văn Chuẩn-Khua anom bruă mă jia tơring čar Dak Lak brơi thâo, bruă jao akŏ phun mơng anom bruă mă jia kiăng djơ̆ hăng hơnong pơkă mrô prăk pơhrui thun 2023 lĕ pel ĕp glăi prăk pơhrui, kơtưn hơdôm hơdră pơhrui glăi hnưh đôm, pok pơhai hơdôm hơdră kiăng pơgăn yua hră pơ-ar duh prăk soh hăng tơlơi pơkă laih dong pok pơhai hơdôm hơdră djru pơhrơ̆i tla hnưh, pơhrŏ ƀiă kiăng anom bơwih ƀong sĭ mơdrô hơkrŭ glăi găn rơgao tơnap tap.