Hlâo kơ anun, Jơnum min mơnuih ƀôn sang tơring čar Dak Lak hơmâo ngă hră pơtrun hiăp djop khua mua sang bruă, gơnong bruă ƀơi tơring čar, hăng abih bang khua jơnum min djop să, phường tañ pok pơhai ngă hrŏm sa amăng plĕ lu hơdră. Djop să, plơi pla ter hang ia rơsĭ pok pơhai hơdră pơhlom tơlơi rơnuk rơnua kơ mơnuih, song nan ƀattô, kông ngăn, biă mă ñu anih anom tuai čuă ngui, kual ia rơsĭ rông akan hơdang; pơtô brơi mơnuih ƀôn sang thâo anih glăi jưh hơđong, ngă kơjăp bơbung sang, anih dŏ, pơgang čơnăng, gruh rông akan hơdang.

Ƀơi hơdôm să, plơi pla čư̆ siăng ăt khom đing nao re se tơlơi pơhing pôr pơthâo anăp kơthel pưh nao, hơjan ia ling dăo brơi mơnuih ƀôn sang thâo, hmao kru bĕ hĭ tơlơi či truh ia dăo, ia lip, lŏn tơhlŏm. Laih dơ̆ng, nao ĕp lăng, jŭ yap glăi djop anih hŭi hơmâo tơlơi truh lŏn adai ngă, prăp lui pơđuăi mơnuih ƀôn sang brơi nao dŏ pơ anih rơnuk rơnua hloh. Djop sang bruă, anom bruă kơnuk kơna prăp lui rơdêh đĭ, gơnam yua mă bruă, mơnong ƀong huă tui hăng hơdră “pă bruă sa anih”; ĕp lăng, jŭ yap glăi, pơtô brơi pơhlom pơgang hơđong bơnư̆ akŏ tli, dơnao pơkong ia; pơphun brơi mơnuih dŏ mă bruă krăp lăng hrơi mlam, pơčrâo jơlan kơ mơnuih ƀôn sang nao rai kiăng rơnuk rơnua ƀơi jơlan hơmâo bơnư̆ ia blai đĭ ƀơi hang, anih ia rô kơtang, ƀu brơi mơnuih ƀôn sang găn rơgao nao rai wơ̆t hăng rơdêh anet prong hai, kiăng pơgang tơlơi rơnuk rơnua kơ ană plơi pla.