Mơ̆ng lơ 29/9, truh lơ 01/10, ƀơi Ƀuôn Ma Thuột, Ping gah tơring čar Dak Lak jơnum ruah khua ping gah tal I, rơwang bruă thun 2025-2030.Nao jơnum hrŏm hơmâo 449 čô khua pơ ala brơi 137.000 čô mơnuih ping gah amăng đơ đam tơring čar.

Jơnum ruah khua rơwang bruă anai, Dak Lak čih pơkra Hră pơtrun hăng anăp ngă bruă ‘Gum pơgôp-Ngă khua pô-Tơpă hơnơ̆ng-Pơblih kơtang-Pơđĭ kyar”, pơkă tơhnal pơđĭ kyar bơwih ƀong huă rim thun truh 10,5%, prăk pơhrui glăi sa čô mơnuih mă bruă sa thun 153 klăk amăng thun 2030, mrô sang anŏ ƀun rin amăng kual plơi pla djuai ƀiă hrŏ trun 3% sa thun; bruă akŏ pơdong ping gah, pơmut ping gah mơ̆ng 3-4% sa thun, rim thun hơmâo rơbêh 90% khul grup, sang bruă ping gah, mơnuih ping gah, dưi tŭ yap, dăp hơnơ̆ng ngă giong bruă jao pơngŏ…

Hrŏm hăng anun, pơƀut bruă mă rơwang bruă mơ̆ng thun 2020-2025, pơkă tơhnal či ngă bruă pơ anăp adih, hơdră pơsir tui hră pơtrun tui rơwang bruă thun 2025-2030. Ƀơi mông jơnum prăp lui hlâo ruah khua ping gah tơring čar Dak Lak lơ 29/09, jơnum anai tŭ ư ruah khul khua git gai mông jơnum, hơmâo 12 čô hăng 3 čô grup čih pioh mông jơnum.