Tơring čar Dak Lak glăk pok pơhai man pơdong 3 boh sang hră pơlir dua gưl ƀơi hơdôm boh să giăm guai Ia Lốp, Ia Rvê hăng Ea Bung, hăng abih tih prăk tuh pơ alin giăm 127 klai prăk. Truh ră anai, lu anih man pơdong ƀơi hơdôm ring bruă anai dưi pơgiong 47% bruă man pơdong. Ƀơi anăp tơlơi rơkâo ngă pơgiong ha amăng plĕ hơdôm boh sang hră kiăng dưi mă yua amăng thun hrăm phrâo, Khua git gai Ping gah tơring čar Dak Lak ơi Lương Nguyễn Minh Triết rơkâo hơdôm anom bruă man pơdong pel ĕp glăi bruă man pơdong, pơhlôm brơi lu mơnuih mă bruă, gơnam măi mok; laih dong jao gơnong bruă pơtô pơjuăt gơgrong ĕp pơmut ƀing nai pơtô, prap lui gơnam măi mok pơtô hrăm, anih dŏ hăng pơjing kơčăo bruă pơtô pơblang, pơtrut pơsur ƀing čơđai nao hrăm hră mơng hrơi blung a thun hrăm phrâo.

Tơring čar Dak Lak ăt rơkâo prap lui djop mơnong ƀong huă pơhlôm hơdjă brơi ƀing čơđai dŏ đŏm glăi, pơhlôm sang hră dưi man pơdong giong kiăng dưi pơtô hrăm mơtăm. Sit biă ñu, khua git gai Ping gah tơring čar Dak Lak rơkâo hơmâo hơdră pơkiăo nao mơnuih djru man pơdong tơdah kiăng, amăng anun hơmâo hơdră gum hrŏm hăng ling tơhan kiăng pơtrut tañ bruă man pơdng, pơgiong hlâo kơ lơ 30/7.