Hăng akŏ lăi nao “Dak Lak-anŏ gêh găl, kiăng pơđĭ kyar”, Jơnum pơphun ĕp bruă tuh pơ alin thun 2026 mơ̆ng tơring čar, hơmâo čơkă 1000 čô khua mua amăng dêh čar hăng jar kmar. Tal jơnum anai, pơphun lu bruă mă hrŏm kah hăng jơnum phun, pơphun man pơdong ring bruă, mă yua hơdôm ring bruă ngă giong laih, pơhưč tuh pơ alin, sem lăng či tuh pơ alin, jơnum pơčrong sai sa hnơ̆ng bruă hăng hơdôm wơ̆t jơnum bưp nao rai dua bơnah plah wah khua mua tơring čar hăng sang bruă mơdrô.

Tơlơi kiăng lăi nao jơnum anai lĕ anăn 133 mơta kơčăo bruă iâu pơthưr tuh pơ alin mơ̆ng črăn thun 2026-2030, hăng rơnoh prăk tuh pơ alin truh kơ 552.000 klai prăk, lu bruă mă gah bruă pơkra ming apui lơtrik pơkra glăi, čuk jơlan mut amăng anom tuh tia pơkra ming sa ƀut, man pơdong plơi prong, tuai čuă ngui truh pơ bruă ngă hmua ba yua boh thâo ia rơgơi phrâo laih anun bruă ia jrao gun.

Amăng anun, tơring čar Dak lak ruah mă năng ai 20 kơčăo bruă phun pioh pơčrâo brơi hơduah ĕp pơphun ngă, laih dơ̆ng jao hră posit ngă tui tuh pơ alin brơi 26 kơčăo bruă, rơnoh prăk rơkâo nao tuh pơ alin rơbêh 48.300 klai prăk ƀơi mông jơnum mơtam.

Pơgôp hiăp ngă pơgiong djop boh yom phun jơnum, ơi Nguyễn Thiên Văn, Kơ-iăng khua Jơnum min mơnuih ƀôn sang tơring čar Dak Lak pơtrun hiăp brơi jŭ yap glăi, pơhrua nao lu bruă dŏ kơƀah, biă mă ñu gah ia jrao hăng pơtô hrăm, hơdôm bruă hlăk hơmâo lu mơnuih tuh pơ alin đing nao:

“Amăng bruă pơkă hlâo mơ̆ng tơring čar ta lanai ƀing ta hơmâo kual lŏn pioh ngă anih lăng ba ƀing tha rơma, hơdôm boh sang ia jrao pơjrao ten hloh khom pơhưč tơlơi tuh pơ alin. Amăng bruă pơtô hrăm, kiăng prăp lui djop lŏn ngă anih man pơdong kơnuk kơna hăng mơnuih ƀôn sang ngă hrŏm, pơhưč bruă man pơdong sang hră lul gưl pơprong či man pơdong”.

Ơi Đỗ Hữu Huy, Khua Jơnum min mơnuih ƀôn sang tơring čar Dak Lak lăi pơtong, tơlơi kiăng pơtong rơđah boh tŭ yua amăng mông jơnum, lăng anai ƀu kơnong kơ bruă mă jak iâu sem lăng tuh pơ alin đôč ôh, khom jing anih lê̆ trun  djơ̆ hnơ̆ng pơhưč bruă mă tuh pơ alain thun 2026.

Tui hăng ơi Đỗ Hữu Huy, tơring čar anai hlăk ngă hăng hơmâo prăp lui laih anŏ gêh găl kiăng yua, amra djru djop mơta pioh čơkă bruă mă tuh pơ alin phrâo. Hăng pran jua mă bruă pơblih mơ̆ng bruă prăp lui truh kơ bruă ngă mơtam, mơ̆ng tơlơi ƀuăn đôč khom pok pơhai ngă tui rơđah rơđong tum teč mơ̆ng mông jơnum anai kah hăng “prăp lui hruh pioh kơ tơlang pah pum glăi dŏ”, pơjing anŏ juă tơkai hrưn đĭ kơtang hloh pok pơhai djop kơčăo bruă pơprong.

“Rơkâo mông jơnum anai, ƀing ta pơphun klă hloh, tŭ yua hloh, lăi tơpă nao kơ bruă mă anŏ či kiăng tui hăng jơlan hơdră, bruă pơtrun, tơgŭ mă bruă; kơtưn gir amăng sa rơwang hrơi tơjuh pơphun bruă mă jơnum anai khom hơmâo lu kơčăo bruă tơgŭ man pơdong hloh, boh yom phun khom jŭ yap glăi brơi lăp djơ̆ hăng anŏ gêh găl”.