Ƀơi plơi Vĩnh Trường, să Phước Dinh, tơring čar Khánh Hòa, lu sang anŏ prap ba đuăi kiăng jao glăi lŏn mơnai man pơdong sang măi apui lơtrik ayuh Ninh Thuận 1. Tơlơi mơ̆ mơnuih ƀôn sang đing nao hloh ră anai lĕ prăk duh glăi, djru brơi hăng dưm dăp anih pơdong plơi pla lơm nao dŏ pơ anih dŏ phrâo. Ơi Nguyễn Văn Trong, mơnuih ƀôn sang să Phước Dinh brơi thâo, lơm thâo blan 3 rơgao, khua pơ ala mơnuih ƀôn sang ba tơbiă tơhnal pơkă, hơdră bruă phrâo kiăng pơsir hĭ hơdôm tơlơi gun brơi bruă duh prăk, pơhrui glăi lŏn mơnai, pơsir hĭ tơlơi rơkâo hlâo anun, mơnuih ƀon sang hur har mơ-ak biă.

“Kơnuk kơna duh prăk djơ̆ pran mơnuih ƀôn sang, anun neh met wa mơ-ak biă. Kơnuk kơna duh glăi prăk, djru brơi klă hloh kơ neh met wa gêh gal nao bơwih ƀong pơ anih dŏ phrâo, ƀu hơmâo sang anŏ hơpă rin glăi”.

Hrŏm hăng tơlơi bơwih ƀong hăng anih dŏ phrâo, bruă ba đuăi, rŭ ba đuăi bong atâo ơi yă amĭ ama ăt ngă lu mơnuih đing nao.Hăng ƀing gơñu, anai ƀu djơ̆ kơnong ba đuăi bong atâo đôč ôh mơ̆ ăt bơdjơ̆ nao tơlơi ngă yang, tơlơi phiăn hăng tơlơi pơpŭ brơi ƀing rơngiă. Yua anun, mơnuih ƀôn sang čang rơmang bruă ngă tui kiăng hơmâo hrơi mông prap lui tong ten, lăp djơ̆ tơlơi phiăn mơnuih ƀôn sang. Ơi Nguyễn Thanh Hiệp, mơnuih ƀôn sang amăng kual man pơdong, să Phước Dinh rơkâo:

“Sang anŏ gơmơi hơmâo 6 boh pơsat kiăng rŭ ba pơkŏn, kâo ăt ngă tui tơlơi črâo trun mơng Ping gah hăng kơnuk kơna kiăng kơ jao lŏn man pơdong sang măi apui lơtrik ayuh Ninh Thuận 1. Bơyan ngă yang hơdor kơ mơnuih rơngiă ăt ƀiă abih laih, kâo ăt rơkâo să ječ ameč rŭ ba đuăi, kiăng neh met wa prap lui klă”.

Rơnuč blan 3 rơgao, Jơnum min apăn bruă khua pơ ala mơnuih ƀôn sang hơmâo tơlơi pơtrun pơhrua, pơplih pơkra sa, dua tơhnal pơkă, hơdră bruă yôm phara amăng tuh pơ alin man pơdong sang măi apui lơtrik ayuh Ninh Thuận. Mơng anun pơgiong tơhnal pơkă djơ̆ tơlơi phiăn amăng duh prăk, djru brơi hăng pơdong anih dŏ phrâo, laih dong pơhlôm brơi tơlơi dưi mơnuih ƀôn sang amăng kual man pơdong. Tui tơlơi pơkă phrâo, hơdôm boh sang anŏ hơmâo djop tơlơi gal amra jao lŏn mơnai ƀơi anih pơdong plơi pla phrâo hăng brơi 100% prăk mă yua lŏn mơnai. Hăng bơdôm lŏn ngă đang hmua ƀu djơ̆ hmua pơdai hơmâo pơplih mă yua tui tơlơi sit nik samơ̆ aka ƀu ngă hră pơhlôm hŭi pơplih, kơnuk kơna ăt sem lăng duh prăk tui mă yua ră anai.

Ơi Nguyễn Văn Quế, Khua jơnum min mơnuih ƀôn sang să Vĩnh Hải brơi thâo, yua tơhnal pơkă, hơdră bruă phrâo, anun bruă duh prăk, pơhrui glăi lŏn mơnai mơng akŏ bruă sang măi apui lơtrik ayuh Ninh Thuận 2 glăk pơtrut tañ.

“Abih bruă jŭ yap glăi, pơsit brơi lŏn pô truh ră anai hơmâo pơgiong, ƀing gơmơi hơmâo git gai gưl yŭ pơsit nua lŏn tui tơlơi pơtrun mrô 121 phrâo hloh. Abih bang hơdôm sang anŏ djop tơlơi gal hơmâo lăi pơthâo lĕ 487 boh sang.”

Tui ơi Nguyễn Văn Nhựt, Khua gơnong bruă sĭ mơdrô hăng tuh tia pơkra ming tơring čar Khánh Hòa, đơ đam lŏn mơnai pơhrui glăi kiăng man pơdong sang măi apui lơtrik ayuh Ninh Thuận 1 hăng sang măi apui lơtrik ayuh Ninh Thuận 2 lĕ rơbêh 760 ektar, hăng giăm 1.400 boh sang anŏ khŏm ba đuăi. Bruă khua pơ ala mơnuih ƀôn sang hơmâo tơlơi pơtrun mrô 121 dưi pơsir hĭ hơdôm tơlơi gun amăng pơhrui lŏn mơnai, djru brơi hăng pơdong anih dŏ phrâo. Yua anun, bruă pơhrui glăi lŏn mơnai ƀơi hơdôm ƀon lan glăk pơtrut tañ, ba glăi tơlơi mut hrŏm mơng mơnuih ƀôn sang. Ră anai tơring čar Khánh Hòa glăk pok pơhai tui pran jua ječ ameč, gir run pơgiong bruă pơhrui glăi lŏn mơnai rơnuč blan 6 thun anai kiăng jao brơi anom bruă tuh pơ alin pok pơhai man pơdong.

“Tơlơi pơtrun anai dưi pơsir hĭ lu mơta, sit biă ñu lĕ hơdôm tơlơi pơgôp hiăp mơng tơring čar Khánh Hòa, tŏ ngă tui tong ten ƀiă hăng jê̆ giăm ƀiă tơlơi sit nik amăng pơhrui lŏn mơnai. Yua anun, bruă duh prăk pơhrui glăi lŏn mơnai hơmâo ngă tañ ƀiă, djơ̆ pran mơnuih ƀôn sang. Ră anai tơring čar glăk đing nao khut khăt, ječ ameč pel ĕp glăi hăng pơsit nua lŏn ia tui mrô pơkă duh glăi mơnuih ƀôn sang tañ hloh”./.