Yă H’Dit Byă, dŏ ƀơi ƀuôn Dhă Prông, phường Buôn Ma Thuột, tơring čar Dak Lăk hok mơak brơi thâo, ñu mơak biă lơ̆m nao khăm mơ̆ djă ba sa telephôn hơmâo pơmut VNeID đôč:“Mơ̆ng hrơi pơmut VNeID lĕ, nao pơ sang ia jrao ƀu kiăng djă ba hră pơhlôm nua dong tah, yua dah hră pơ-ar hơmâo pơmut abih amăng telephôn yơh, jing gêh găl biă mă”.

Tui mrô jŭ yap, amăng thun anai, abih bang tơring čar Dak Lăk hơmâo rơbêh 6,9 klăk wơ̆t mơnuih nao khăm, đih pơjrao mă yua căn cước công dân; rơbêh 2,5 klăk hră căn cước hơmâo pơmut tom hră pơhlom nua ia jrao dŏ hrơi pơkă. Anai jing tơlơi tŭ yua blung a mơ̆ng Kơčăo bruă pơđĭ tui mă yua glông djă pioh mrô ană mơnuih anih dŏ, anăn păn, hăng pơsit rơđah điện tử djru pơplih mă yua boh thâo mrô dêh čar (iâu lĕ Kơčăo bruă mrô 06) ƀơi tơring čar.

Thượng tá Võ Hùng Tường, Khua anom bruă tơhan pôlih wai lăng hơđong rơnuk rơnua mơnuih mơnam, Kông an tơring čar Dak Lăk brơi thâo, tơhan kông an hơmâo nao tơl sang pơtô brơi ană plơi pơmut, mă yua tài khoản glông djă pioh anăn amăng điện tử VNeID, biă ñu pơ kual ataih, asuek, kual mơnuih ƀôn sang djuai ƀiă. Mơ̆ng anun, thâo hluh, hăng hơmâo abih bang mơnuih tŭ ư pơplih phrâo bruă ngă hră, mă yua boh thâo mrô hơmâo pơđĭ tui laih: “Pơsit pơplih phrâo anom bruă ngă hră jing bruă akŏ phun hăng pơplih prong, kiăng pơđĭ tui tŭ yua djŏp bruă mă, ƀrô ngă gêh găl hloh kơ mơnuih ƀôn sang, anom mơdrô. Hrơi blan rơgao, gơmơi ƀrô ngă klă bruă lăi pơthâo pơphô brơi khua mua Kông an tơring čar, ƀrô pơphun ngă dưm kơnar ha amăng plĕ hơdră wai lăng gah hơđong rơnuk rơnua mơnuih mơnam ƀơi tơring”.

Ngă tui Kơčăo bruă mrô 6, amăng 3 thun rơgao, tơring čar Dak Lăk ngă giong laih bruă pơhrui, brơi hră căn cước công dân hơmâo tep čip kơ abih bang mơnuih amăng hnưr thun dưi ngă; brơi anăn điện tử kơ rơbêh 10.000 anom bruă čar, khul grup. Truh ră anai, giăm 10.000 pok hră brơi hră čih pơthâo djŏp tơlơi soh tơdah hơmâo hơmâo ngă tui VNeID; rơbêh 90% bruă ngă hră hơmâo ngă amăng plang internet, plih tui ƀơƀrư̆ mơ̆ng hla pơ-ar jing hră mrô.

Hrŏm hăng bruă pơmut dưm kơnar, kah pơpha hyu mrô čih pioh ană mơnuih dŏ amăng plơi pla, Kơčăo bruă mrô 06 ƀơi Dak Lăk glăk pơkra tui ƀơ ƀrư̆ hră pơ-ar amuñ ƀiă, gêh găl ƀiă, rơđah rơđông hloh kơ mơnuih ƀôn sang. Lu hơbô̆ bruă phrâo kah hăng lăi pơthâo anih dŏ đih pơdơi glăi tui glông boh thâo ASM, pơkra hră pơ-ar gah lŏn tơnah, wai lăng mơnuih mă yua lŏn tui Glông djă pioh dêh čar kơ ană mơnuih amăng plơi pla, VNeID ƀudah kiosk ngă mă pô ƀơi hơdôm boh sang ia jrao, kiăng plai ƀiă rơngiă mông tơguan, plai ƀiă bưp ƀơi anăp.

Tui hăng Đại tá Trần Bình Hưng, Kơ-iăng khua Kông an tơring čar Dak Lăk, kiăng hơdôm bruă anai dưi ngă hnong, tơlơi gơgrong mơ̆ng ƀing khua mua yom biă mă: “Pô ngă khua yơh pô pơtô ba, hăng git gai ƀing apăn bruă, ling tơhan pok pơhai ngă bruă. Kiăng ngă tŭ yua Kơčăo bruă mrô 6 amăng thun 2025 hăng hơdôm thun pơ anăp, pô khua amăng anom bruă yom biă mă”.

Hăng tơlơi ngă bruă bơkơnar, khut khăt mơ̆ng abih bang anom bruă čar, truh mông anai, Dak Lăk hơmâo dưm anăn “XANH” ƀơi abih bang 102 boh să, phường; čih pơkra giong 108 rơnoh pơkă tui Kơčăo bruă mrô 02 mơ̆ng Khul git gai dêh čar kơ pơtrut mă yua boh thâo mrô pơtruh hăng dlông, dưm kơnar, tañ, tŭ yua. Dak Lăk jing sa amăng hơdôm boh tơring blung a amăng dêh čar ta ngă giong bruă jao hlâo kơ hrơi pơkă, djơ̆ tui hăng tơlơi dưm dăp anom bruă čar hăng mă bruă tui gong gai dua gưl. Bruă anai pơsit anŏ pơplih anom bruă ngă hră nao hrŏm hăng Kơčăo bruă mrô 06 ƀu kơnong jing hơdră pơsir djơ̆ boh thâo đôč ôh, anai jing tơlơi plih blung a amăng bruă krăp lăng, djru pơđĭ tui anŏ klă bơwih brơi mơnuih ƀôn sang, anom mơdrô, laih anun hơmâo Kơnuk kơna ta bơni./.