Thun 2022, rơnoh prăk pơhrui jia amăng tơring čar Dak Lak hơmâo 8.900 klai prăk, dưi ngă 141% pơkă hăng rơnoh dêh čar jao, 119% rơnoh mă jia anom bruă khua pơ ala mơnuih ƀôn sang tơring čar jao, đĭ hloh 30% pơkă hăng tal anai thun 2021. Amăng anun, prăk duh jia, prăk apah yua anom bruă duh jia pô wai lăng hăng pơhrui mă hơmâo 5.800 klai, dưi ngă 127% pơkă hăng kơnuk kơna jao hăng đĭ hloh 15% pơkă hăng khua mua pơ ala mơnuih ƀôn sang tơring čar jao.

Kiăng dưi ngă djop boh tơhnal anai, rơngiao kơ hơdôm tơlơi gir run mơ̆ng anom bruă mă jia lĕ, dŏ hơmâo tơlơi gum hrŏm mơ̆ng djop sang bruă kơnuk kơna, mơnuih ƀôn sang hơmâo anăn duh jia. 235 boh anom bruă, khul grup hăng mơnuih duh jia ba gru hlâo dưi hơmâo Ding jum prăk kăk, Jơnum min mơnuih ƀôn sang tơring čar, anom bruă mă jia tơring čar Dak Lak apah bơni, pơpŭ đĭ amăng mông jơnum kiăng čih pioh tơlơi djru hrŏm bruă ngă duh jia mơ̆ng gơñu.