Tlam mơmŏt lơ 20/10, Khul đah kơmơi ngă bruă mơdrô tơring čar Dak Lak jơnum hơdră bưp ƀô̆ mơta ƀrô hơdor glăi 95 thun hrơi akŏ pơjing khul đah kơmơi mut phung Việt Nam, lơ 20/10/1930-lơ 20/10/2025 laih anun pơplông Đah kơmơi ngă bruă mơdrô hiam bơnai tal 3 hăng akŏ ñu Đah kơmơi ngă bruă mơdrô rơnuk hrưn đĭ pô. Ƀơi mông bưp ƀô̆ mơta, Khul pơphun jơnum pơpŭ, apah bơni hơmâo pơpŭ bơni kơ sang bruă, khul grup, ƀing đah kơmơi ba gru hlâo, jao hră pơsit khul tŭ jum ding kơna phrâo, laih dơ̆ng pơphun tal pơplông “Đah kơmơi mơdrô hiam bơnai” hăng hơdră pơplông buh ao dai, lăi glăi tơlơi tơña hăng pơdah tơlơi adoh suang.

Pơhiăp ƀơi mông jơnum, Y Giang Gri Niê Knơ̆ng, Kơ-iăng khua git gai ping gah, Khua Jơnum min wai lăng djop djuai ania mơnuih mơnam Việt Nam tơring čar Dak Lak, pơ ala kơ khul khua mua ping gah tơring čar Dak Lak čih pioh hăng pơpŭ bơni kơ khul grup đah kơmơi ngă bruă mơdrô hơmâo djru hrŏm pơđĭ kyar bơwih ƀong huă ƀơi tơring čar, pơblih yua mrô, thâo pơčeh phrâo ia rơgơi, kiăng pơtong rơđah tơlơi glăm ba hăng bruă ngă khin hơtai mơ̆ng gơñu amăng rơnuk mut phung hăng pơblih yua mrô.