Tơring čar Dak Lăk glăk hơmâo 1.069 čô tha plơi, mơnuih ană plơi kơnang. Thun blan laih rơgao, khul anai djru iâu pơthưr, pơtô ba mơnuih ƀôn sang đĭ kyar bơwih ƀong, hrŏ trun ƀun rin, man pơdong plơi pla phrâo; bong kjăp rơnuk rơnua amăng plơi, pơsir kơđi; răk pioh gru ama grua amĭ. Lu mơnuih nao hlâo amăng bruă ngă hmua, iâu pơthưr neh met wa pơplih tơlơi bơwih ƀong, abih bang mơnuih tŭ ư ngă tui hơdôm tơlơi pơtrun mơ̆ng kơnuk kơna ƀơi ƀôn lan.

Ƀơi mông jơnum, ƀing khua lăi nao lu boh thâo, hơdră iâu pơthưr mơnuih ƀôn sang hrưn đĭ pơklaih ƀun rin, pơsir kơđi, răk pioh gru grua, ngă hơđong anih hơdip amăng plơi pla laih anun gum bong kjăp rơnuk rơnua. Khul hơmâo pơpŭ bơni kơ 220 čô tha plơi, khua plơi, mơnuih hơmâo kơnuih hiam ană plơi hmư̆ laih anun 11 grup hơmâo lu tơlơi gum pơgôp hơduah ĕp bruă mă, djru bơwih ƀong, hrŏ trun ƀun rin hăng đĭ kyar bơwih ƀong huă - mơnuih mơnam kual mơnuih ƀôn sang djuai ania ƀiă./.