Tui hơnong pơkă pơđĭ kyar, rơwang thun 2026-2030, Dak Lak ba tơbiă hơnong pơkă pơđĭ kyar mơng 11-11,5% ha thun; abih tuh GRDP 5 thun him lăng giăm 700 rơbâo klai prăk. Tui hơnong pơkă pơđĭ kyar rĭm thun lêng dua mrô, mơng 10,2% thun 2026 đĭ 12% amăng thun 2030. Hơdôm bruă pơtrut pơđĭ kyar hơmâo pơsit anun lĕ ngă hmua pơđĭ kyar hơđong kjăp, tuh tia pơkra ming lĕ bruă pơtrut tañ, bơ man pơdong anih tŭ mă amăng pơđĭ kyar lơm lu akŏ bruă pơprong hơmâo pok pơhai ngă. Samơ̆, rơwang tal I/2026, rơnoh pơđĭ kyar GRDP kơnong giăm 7,5%, aset ƀiă pơhmu hăng hơnong pơkă. Hơdôm kual akŏ phun lêng đĭ kaih, amăng anun man pơdong kơnong 3,5%. Rơnoh hrŏ trun đing nao bruă bơwih bơwang, man pơdong hăng tuh tia pơkra ming. Abih tih prăk tuh pơ alin amăng mơnuih mơnam hrŏ trun pơhmu tui tơđar. Lăi nao tơlơi ba truh, ơi Cao Đình Huy, Khua gơnong bruă man pơdong tơring čar Dak Lak brơi thâo, hơdôm tơlơi gun amăng pơhrui glăi lŏn mơnai hăng bruă man pơdong bơdjơ̆ nao bruă pơđĭ kyar:

“Tơlơi gun amăng bruă man pơdong kah hăng jao trun prăk tuh pơ alin kaih lĕ yua kơ bruă pơhrui glăi lŏn mơnai dŏ kaih; dua dong lĕ bruă man pơdong mơng hơdôm anih anom ră anai aka ƀu klă. Mơng krăo lăng sa, dua akŏ bruă ră anai, hơdôm anom bruă man pơkra dŏ kaih, rơkâo hơdôm anom bruă tuh pơ alin kiăng khut khăt, pơtrut pơsur hăng amra lui hĭ tŏ tui hră pơkôl hăng hơdôm anom bruă man pơkra kaih”.

Hăng hơdôm kual tuh tia pơkra ming, tơlơi rơkâo ră anai lĕ tañ pơsir hĭ hơdôm tơlơi gun amăng hơdôm akŏ bruă apui lơtrik hăng pơgiong man pơdong anih anom, kual tuh tia pơkra ming kiăng dưi ngă djơ̆ hơnong pơkă pơđĭ kyar rơbêh 13% amăng rơwang pơ anăp. Yă Nguyễn Thị Thu An, Khua gơnong bruă sĭ mơdrô hăng tuh tia pơkra ming brơi thâo, mah tơhnal pơkă hơmâo pơplih pơkra blung a, samơ̆ bruă pok pơhai ăt dŏ sư̆ rơbư̆ yua kơƀah tơlơi črâo ba tong ten:

“Tơlơi pơtrun mrô 253-254 mơng Khua pơ ala mơnuih ƀôn sang dêh čar phrâo anai hơmâo pơsir hĭ kơ bruă pok pơhai akŏ bruă apui lơtrik pơkra phrâo, sit biă ñu lĕ ƀơi hơdôm kual tơnap tap. Samơ̆ tơhnal pơkă hơmâo pok rai hơdôm hơdră bruă hăng hơdôm tơlơi pơkă tong ten amăng hơdôm tơlơi pơtrun truh ră anai aka ƀu ba tơbiă yua anun djop gơnong bruă ăt sư̆ rơbư̆ amăng bruă pok pơhai”.

Hơmâo tơlơi rơkâo kiăg wai lăng tui rĭm gơnong bruă, rĭm rơwang ngă bruă kiăng wai lăng bruă pơđĭ kyar, ơi Đào Mỹ, kơ-iăng Khua Jơnum min mơnuih ƀôn sang tơring čar Dak Lak brơi thâo hơmâo tơlơi pơkă tui tơlơi glăm ba tong ten:

“Hơdră ngă tui rơđah rơđông ƀiă, kiăng kah pơpha brơi tong ten tui rĭm thun, rĭm gơnong bruă. Amăng abih tih gơnam tam hơmâo 698 rơbâo klai prăk anai kiăng kah pơpha brơi thun 2026 hơdôm ñu, mơng anun kah pơpha brơi hơdôm gơnong bruă pơhmutu bruă ngă hmua hơdôm ñu, tuh tuh pơkra ming, man pơdong hơdôm, sĭ mơdrô hơdôm tơdơi anun kah pơpha brơi rĭm rơwang mơng anun pơsit, bruă ngă hmua ngă hiưm pă, bruă đang glai hiưm pă, akan hơdang hiưm pă hăng rĭm gơnong bruă hơmâo akŏ bruă čih ngă hơget, hơmâo gơnam hơget kiăng pơsit tơlơi glăm ba lơm git gai wai lăng.”

Ƀơi anăp kơ tơlơi rơkâo pơđĭ kyar dua mrô amăng hrơi blan lu bruă phun ngă dŏ kaih, ơi Lương Nguyễn Minh Triết, Khua git gai Ping gah tơring čar Dak Lak rơkâo kiăng hơmâo hơdră pơtrut tañ, sit biă ñu amăng bruă ngă hră pơ-ar hăng pơhưč tuh pơ alin sui pơ anăp. Laih dong, kiăng hơmâo tơhnal pơkă akŏ phun, tañ amăng pok pơhai hơdôm akŏ bruă pơprong, ngă atur brơi pơđĭ kyar mơng thun 2026 mơtăm.

“Đing nao khut khăt amăng pơplih pơhlôm gêh gal amăng bruă tuh pơ alin, kiăng tañ ƀiă amăng bruă ngă hră pơ-ar, prăk duh lơm ngă hră pơ-ar, lăng anai lĕ akŏ bruă ngă pơtrut kơtang amăng rơwang ngă bruă ră anai amăng tơring čar. Akŏ pơjing tơhnal pơkă pok phư brơi hơdôm akŏ bruă phun hăng tơhnal pơkă phrâo kiăng pơhưč hơdôm akŏ bruă tuh pơ alin yôm phăn.”