Amăng mông jơnum, ƀing pơ ala djop gơnong bruă, sang bruă đing nao pơčrông sai, lăng glăi djop mơta kơ bruă pơplih nua sĭ mơdrô amăng tơring čar. Hluai tui tơlơi anun, djop gơnong bruă, sang bruă hơmâo ba tơbiă lu hơdră bruă akŏ phun kiăng tŏ tui wai lăng klă nua sĭ mơdrô pơ anăp dong, anun lĕ kơtưn bruă kiăo tui lăng, đăo lăng hlâo bruă sĭ mơdrô; gơgrong pơhlôm djop gơnam sĭ mơdrô; pơtrut amăng bruă pel ĕp, wai lăng nua sĭ, hmao tlôn pơsir hĭ bruă pioh dŏp lui gơnam, sĭ nua pơmă.

Ơi Phạm Anh Tuấn, Khua Jơnum min mơnuih ƀôn sang tơring čar Gia Lai rơkâo djop gơnong bruă, ƀôn lan pok pơhai hơdră wai lăng khut khăt nua gơnam; pơsir hĭ bruă pioh dŏp gơnam kiăng sĭ hơmâo nua ƀudah sĭ nua pơmă; anom bruă sĭ mơdrô ngă soh amra ƀu brơi sĭ dong tah, kiăng pơsir hĭ djop, ƀu hơmâo anih kŏm ôh.