Him lăng hrơi mông mă bruă amăng jơnum anai lĕ giăm 11 hrơi, pơčlah jing 2 tal (tal sa: mơng lơ 6/4 truh lơ 12/4; tal dua mơng lơ 20/4 truh lơ 23/4/2026). Amăng jơnum blung a anai, Khua pơ ala mơnuih ƀôn sang dêh čar amra pơphun bruă ruah khua mua pơprong amăng Kơnuk kơna, sem lăng tŭ yap mă yua 8 črăn tơlơi phiăn, 1 črăn tơlơi pơtrun djơ̆ tơlơi phiăn; laih dong sem lăng, pơsit hơdôm akŏ bruă pơprong amăng dêh čar kơ pơđĭ kyar bơwih ƀong huă-mơnuih mơnam, pơhlôm rơnuk rơnua, bruă prăk kak dêh čar, tuh pơ alin, tla hnưh amăng rơwang 5 thun pơ anăp. Tui anun, Khua pơ ala mơnuih ƀôn sang dêh čar amra ruah ƀing khua mua pơprong hơmâo: Khua git gai pơ ala mơnuih ƀôn sang dêh čar, kơ-iăng Khua git gai pơ ala mơnuih ƀôn sang dêh čar, Ding kơna khul djru bruă Khua pơ ala mơnuih ƀôn sang dêh čar, Khua mir sir, kơ-iăng khua mir sir, Khua dêh čar, Khua sang phat kơđi dêh čar, Khua anom bruă pơsir kơđi tơlơi dêh čar, Khua wai lăng bruă jŭ yap dêh čar.

Laih dong, Khua pơ ala mơnuih ƀôn sang dêh čar ăt tŭ yap tơlơi rơkâo ruah ƀing khua mua amăng Kơnuk kơna hơmâo: ƀing kơ-iăng khua dêh čar, ƀing khua ding jum hăng ƀing ding kơna amăng kơnuk kơna hrŏm hăng sa, dua anih mă bruă tui tơlơi glăm ba. Tui tơlơi pơkă amăng phiah phiăn thun 2013, tơdơi kơ hơmâo Khua pơ ala mơnuih ƀôn sang dêh čar ruah, Khua git gai pơ ala mơnuih ƀôn sang dêh čar, khua mir sir, khua dêh čar, khua sang phat kơđi amra đĭ ƀuăn ngă bruă ƀơi anăp Khua pơ ala mơnuih ƀôn sang dêh čar.