Amăng rơwang hrơi tơjuh pơphun thun tuai čuă ngui dêh čar 2026 pơphun rơnuč blan 3 rơgao, Gia Lai čơkă hơdôm hơpluh rơbâo tuai čuă ngui amăng lŏn ia hăng tač rơngiao nao ĕp lăng. Anih pơbưp nao rai hăng ngui ngor hơmâo djop mơta hăng hơdôm bruă ngă phara: mơng Jơnum pơđĭ kyar bơwih ƀong huă tuai čuă ngui Gia Lai 2026, jơnum pơsur tuh pơ alin, hơdôm jơlan hơdră pơbưp jar kmar, truh pơ hơdôm tơlơi ngui adôh suang hăng ngui pĕ gông brô̆ dik dak mơ-ak. Hơdôm bruă ĕp lăng anai kơđŏm glăi hơdôm tơlơi hiam klă hăng tuai čuă ngui, pơgôp ba tơring čar Gia Lai jing anih tui nao kơđŏm glăi tơlơi mơ-ak klă amăng thun tuai čuă ngui dêh čar. Lê Thanh Phương Hạ, tuai čuă ngui mơng plơi prong Nha Trang, tơring čar Khánh Hòa brơi thâo:

“Kâo rai mơng Nha Trang, anai lĕ tal blung a ƀơi kual tong krah dong mơng hlâo anun kah hơmâo sa mông ngui adôh suang prong tui anai, yua anun kâo khŏm rai lăng yơh. Kâo đĭ rơdêh thut mơng Nha Trang rai pơ anai rơngiă rơbêh 4 mông ha mơkrah, samơ̆ amăng pran jua hur har hăng mơ-ak biă mă lơm nao rai truh pơ Gia Lai”.

Amăng hơdôm hrơi hyu čuă ngui ƀơi Việt Nam, ơi Roman, tuai čuă ngui mơng dêh čar Nga, ñu dưi mut hrŏm hơdôm hrơi ngui dik dak mơ-ak amăng rơwang hrơi tơjuh pơphun thun tuai čuă ngui dêh čar 2026 ƀơi Gia Lai. Amăng anih pơmut hrŏm ia rơsĭ-čư̆ siăng bă blai gru grua yôm phara amăng ƀon lan, ơi Roman brơi thâo, tal ngui ngui anai kơđŏm glăi amăng pran jua ñu hrŏm hăng ƀing gơyut mơng dêh čar Nga lu anŏ yôm phara: “Ñu ăt hyu čuă ngui lu anih ƀơi Việt Nam anun lĕ Đà Nẵng, Nha Trang, samơ̆ ƀơi anai hơmâo mơnuih pơtum pơƀut. Tal anai rai pơ Gia Lai, kâo ƀuh hơmâo lu anih hiam, hơđong hăng dŏ djă pioh anŏ sô hơđăp. Sit biă ñu, rai djơ̆ thun tuai čuă ngui dêh čar ngă kơ tal hyu ngui anai yôm phăn ƀiă.”

Tŏ tui anŏ klă ba glăi mơng mông pơphun, amăng rơwang tal II/2026 mơtăm, tơring čar Gia Lai tŏ tui pơtrut kơtang bruă pơsur lăi pơthâo ƀơi hơdôm hrơi jơnum sang čơ pơprong ƀơi Hà Nội hăng ƀôn prong Hồ Chí Minh. Laih dong, Gia Lai ăt amra pơphun lu bruă mă kiăng kơđŏm glăi anŏ hiam amăng thun tuai čuă ngui dêh čar 2026, sit biă ñu amra hơmâo mông ngui adôh suang jar kmar (K-Pop), ba glăi tơlơi pơplih phrâo brơi kơ rup rap čuă ngui. Hrŏm hăng anun, Festival jar kmar ngui atông čing kual Dap kơdư amra lĕ mông ngui ngor, bă blai gru grua yôm phara kual Dap kơdư. Khua ding jum gru grua, bơrơguăt drơi jăn hăng tuai čuă ngui Nguyễn Văn Hùng lăng yôm hơdôm bruă mă hăng tơlơi čang rơmang amăng thun tuai čuă ngui dêh čar amra jing tơlơi pơtrut pơsur brơi bruă tuai čuă ngui amăng tơring čar Gia Lai.

“Hăng 244 bruă mă hơmâo pơphun na nao amăng thun 2026. Kiăng kơ thun tuai čuă ngui dêh čar amra jing bruă akŏ phun kiăng pơtrut lăi pơthâo rup rap tơring čar Gia Lai phrâo, ngă hur har, jê̆ giăm, bă tơlơi dưi, kơtưn pơlir amăng kual tui glông rơnoh yôm, pơhưč tuh pơ alin amăng bruă tuai čuă ngui, pơjing gơnam bơwih brơi tuai čuă ngui yôm phara, klă hloh hăng dưi bơkơtưn amăng jar kmar."

Tơring čar Gia Lai ba tơbiă hơnong pơkă dưi čơkă giăm 15 klăk tuai čuă ngui, hăng dưi pơhrui giăm 35.000 klai prăk amăng thun tuai čuă ngui dêh čar 2026. Anai ăt lĕ tơlơi gal kiăng Gia Lai pơsit tong glăi rup rap tuai čuă ngui, pơtrut pơlir kual hăng pơđĭ kyar tui jơlan gah hơđong kjăp. Ơi Phạm Anh Tuấn, Khua Jơnum min mơnuih ƀôn sang tơring čar Gia Lai pơsit tong tơlơi gir run mơng tơring čar:

“Tơring čar Gia Lai ƀuăn amra pơphun truh kih thun tuai čuă ngui dêh čar 2026 hăng pran ngă bruă klă hloh, rơnuk rơnua, jê̆ giăm, bă blai gru grua kiăng rĭm čô tuai nao čuă ngui lêng kơ ƀuh tơlơi rơhmač jê̆ giăm, yôm phara hăng amra hơdor na nao. Ƀing gơmơi đăo gơnang lĕ mơng mông jơnum ngui anai, Gia Lai phrâo amra hrưn đĭ pô jing anih pơhưč tuai, anih pơtum pơƀut, pơlir hơbit, ngă lar hyu anŏ yôm phara gru grua hăng tuai čuă ngui mơng Việt Nam hăng amăng kual.”

Thun tuai čuă ngui dêh čar 2026 ƀơi tơring čar Gia Lai pơphun tŏ tui na nao hăng lu bruă mă dik dak amăng ha thun. Mơng hơdôm jơlan hơdră gru grua yôm phara mơng kual Dap kơdư truh pơ hơdôm mông ngui pĕ gông brô̆, tuai čuă ngui pơplih phrâo prong gưl jar kmar, tơring čar glăk ƀơƀrư̆ pơjing rup rap anih čuă ngui phrâo, lu anŏ kiăng ĕp lăng. Hăng tơlơi mut hrŏm mơng gong gai, anom bơwih ƀong sĭ mơdrô hăng mơnuih mơnam, Gia Lai čang rơmang pơtrut pơplih kơtang amăng pơhưč tuai čuă ngui, laih dong ngă atur kiăng bruă tuai čuă ngui jing gơnong bruă bơwih ƀong huă yôm phăn, pơgôp ba kual lŏn pơtum pơƀut kơplah wah čư̆ siăng-ia rơsĭ jing anih pơhưč tuai amăng hră lơkak tuai čuă ngui Việt Nam hăng jar kmar./.