Đĭ pơhiăp amăng jơnum blung a, Khua pơ ala mơnuih ƀôn sang dêh čar tal XVI, Khua git gai Ping gah dêh čar ơi Tô Lâm lăi pơtong, anai lĕ jơnum ruah khua mua pơprong amăng dêh čar tui djơ̆ phiah phiăn; laih dong anai lĕ jơnum đing nao pơgiong tơhnal pơkă mơng tơlơi pơtrun Jơnum ruah khua mua đơ đam dêh čar tal XIV mơng Ping gah, ngă atur djơ̆ tơlơi phiăn, hơmâo tơhnal pơkă hăng hơdră pơtrut kiăng dêh čar ta yak nao rơwang pơđĭ kyar phrâo, rơkâo rĭm čô Khua pơ ala mơnuih ƀôn sang dêh čar tal XVI kiăng pơmĭn dơlăm, ƀing ta ƀu djơ̆ kơnong lĕ ƀing pơ ala brơi anih anom plĕ hră ruah khua mua, ƀu djơ̆ kơnong djă ba hră pơ-ar dong yua mơng mơnuih ƀôn sang ruah khua đôč ôh mơ̆ ăt glăm ƀơi bra hăng bruă pơprong amăng dêh čar, hăng pran đăo gơnang mơng mơnuih ƀôn sang, hăng tơlơi hơdip kơñ pơgi ni anăp brơi rơnuk tơdơi.

Hăng pran jua anai, Khua git gai Ping gah rơkâo, Khua pơ ala mơnuih ƀôn sang dêh čar tal XVI đing nao ngă tui klă 4 bruă jao pơprong, amăng anun kiăng hrưn đĭ prong ƀiă dong bruă pơgiong tơhnal pơkă, ngă tui tơlơi pơtrun mơng Ping gah jing hơdră bruă hăng tơlơi phiăn; pơjing tơlơi pơkă djơ̆ tơlơi phiăn kjăp phik kiăng ngă truh kih hơdôm bruă jao pơđĭ kyar bơwih ƀong huă-mơnuih mơnam rơwang thun 2026-2031 hăng hơdôm thun pơ anăp dong. Sa wŏt dong lăi pơtong, hăng gru grua 80 thun hing ang mơng Khua pơ ala mơnuih ƀôn sang dêh čar Việt Nam; tui tơlơi git gai khut khăt, thâo rơgơi mơng Kơnuk kơna hăng djop anih anom kơđi čar; Khua git gai Ping gah đăo gơnang, Khua pơ ala mơnuih ƀôn sang dêh čar tal XVI amra pơgiong klă bruă mơng Ping gah, Kơnuk kơna hăng mơnuih ƀôn sang jao; pơgôp hrŏm hăng Ping gah, abih bang mơnuih ƀôn sang, ling tơhan ngă tui djơ̆ bruă pơjing dêh čar Việt Nam rơngai, rơnuk rơnua, ngă pô, pơdrong sah, prong kơtang, yâo mơ-ak, kjăp yak đĭ chủ nghĩa xã hội.