Jơnum anai hơmâo 449 čô khua nao pơhmư̆, pơ ala brơi rơbêh kơ 137.000 čô mơnuih ping gah, ơi Nguyễn văn Nên - Khua grup čih pơkra hră pơ-ar Jơnum ping dêh čar tal 14, hrŏm hăng khua mua hơdôm Ding jum, anom bruă mơ̆ng gơnong dlông hăng tơring čar pơhmư̆ tom. Kiăng dưi ngă, mông Jơnum anai pơsit 3 mơta bruă pơplih yôm phun: Pơdĭ kyar mơnuih mă bruă rơgơi, nao hrŏm hăng pơplih bruă mă mơ̆ng ƀing khua, mơnuih mă bruă; Pơtrut mă yua boh thâo ia rơgơi, pơčeh phrâo, pơplih yua boh thâo mrô amăng 3 gong tơmeh phun: gong gai mrô, bơwih ƀong mrô, abih bang mơnuih yua mrô; Pơƀut tuh pơ alin jơlan, anih anom, sang dŏ, biă ñu lĕ jơlan rơdêh đuăi hmar, jơlan juăt nao rai, kual sang măi pơkra gơnam, plơi prong.

Pơhiăp git gai mông Jơnum, ơi Nguyễn Văn Nên - bơni kơ hơdôm bruă mơ̆ tơring čar hơmâo ngă, laih dong kiăng Dak Lăk pơtrut tui tơlơi gêh gal  hơmâo “glai- ia rơsĭ”, pơtrut pơtruh nao rai kual, pơđĭ tui anŏ klă mơnuih mă bruă, gir pơplih tơlơi phiăn, pơplih anih tuh pơ alin. Mông jơnum lăi pơthâo Tơlơi pơtrun mơ̆ng Ding jum kơđi čar git gai kơ Khul khua gum bruă, Khul khua apăn bruă git gai, Khua ping gah, Kơ-iăng khua ping gah tơring čar rơwang thun 2025-2030. Ơi Nguyễn Đình Trung, Ding kơna Ping gah hơmâo ruah ngă Khua git gai Ping gah tơring čar Dak Lăk rơwang thun 2025-2030./.