Ƀơi mông jơnum, Khul khua apăn bruă Ping gah tơring čar Dak Lăk pơthâo hơdôm hră pơ-ar yom mơ̆ng Ding jum kơđi čar, Khul khua git gai Ping gah hăng Ping gah tơring čar, pơƀut bruă akŏ pơdong Ping gah; bruă mă, hơdră ngă phun atur kiăng đĭ kyar hơđong hăng 2 mrô pơ anăp anai; tơlơi hơmâo ngă mơ̆ng anom bruă kơđi čar hăng gong gai dua gưl; hơdră pơplih prong kơplong đĭ pơ anăp amăng bruă ruah, dăp bruă, mă yua hăng apah bơni ƀing khua; mơnuih apăn bruă; pơđĭ tui tơlơi git gai mơ̆ng Ping gah hăng bruă pơgang, pơsir hĭ tơlơi truh lŏn adai ngă; gơgrong bruă lăi pơthâo pơblang rơđah amăng bruă čar.

Pơhiăp git gai mông jơnum, yă Cao Thị Hòa An, Kơ-iăng khua Ping gah tơring čar kiăng djŏp gưl ping gah ƀu lăng bruă pơthâo tơlơi pơtrun lĕ bruă ngă đôč đač, ƀu dưi jao hlao kơ khul pơphô bruă ôh; khŏm pơsit anai jing bruă pok pơhư brơi năng blung, yom biă mă đah mơ̆ng djơ̆ hrŏm amăng tơlơi pơmin, bruă mă amăng abih bang anom bruă kơđi čar.