Tơring čar Dak Lak ră anai hmâo năng ai ñu 150 bôh anom mă bruă hrŏm gah đang hmua, rơbêh kơ 270 blah đang hmua, blok đang hăng rơbêh kơ 15.500 bôh sang anô̆ mơnuih ngă đang hmua hmâo pơlir ngă đang hmua hăng sĭ gơnam hăng anom bơwih ƀong. Bruă gum hrŏm hơdră pơlir hơbit ba glăi lu bôh tŭ yua kơ hơdôm bơnah gum hrŏm. Hơdôm bôh anom bơwih ƀong, Anom mă bruă hrŏm hmâo hơdôm mrô gơnam hơđong, klă hiam; pơsir bruă sĭ hyu gơnam kơ mơnuih ngă đang hmua hluai tui hră pơkôl pơlir hơbit, pơjing bruă mă kơ mơnuih ƀôn sang. Hrŏm hăng anun, bruă pơlir hơbit pơjing rai gơnam hơdjă, pơhlôm klă, hơdôm phun akha rơđah kơ mơnuih blơi yua, pơjing bruă mă kơ mơnuih mă bruă. Bruă mă yua bôh thâo phrâo amăng ngă đang hmua djru plai ƀiă bơdjơ̆ nao sat lŏn drŏn.

Phrâo anai, Jơnum min mơnuih ƀôn sang tơring čar Dak Lak pơphun jơnum pơsit 5 thun ngă tui Tơlơi pơtrun pơkă 98 thun 2018 mơ̆ng Gong gai dêh čar. Amăng mông jơnum, ƀing khua pơ ala hmâo rơkâo ba tơbiă hơdôm jơlan ngă tui hơdôm rơwang bruă, kơčăo bruă pơlir hơbit hăng sĭ gơnam mă mơ̆ng đang hmua ba glăi bôh tơhnal hloh dong. Ơi Huỳnh Bài, Khua Khul pơlir hơbit anom mă bruă hrŏm tơring čar Dak Lak rơkâo đĭ:

 “Khul pơlir hơbit anom mă bruă hrŏm tơring čar čang rơmang hmâo tơlơi đing nao kơ jơlan hơdră pơtô juăt mơnuih mă bruă, dua lĕ ngă gal brơi pioh hơdôm bôh anom mă bruă hrŏm hmâo lŏn pơđĭ kyar kual tơjŭ pla ăt kah hăng pơdŏng anih anom dưm gơnam pioh kơ bruă đang hmua. Hăng hơdôm gưl gŏng gai ăt kah hăng anom bơwih ƀong hmâo tơlơi pơlir hơbit ĕp jơlan ba hyu sĭ gơnam mơ̆ng anom mă bruă hrŏm hmâo tơlơi hơđong”.

Ơi Huỳnh Bài ăt brơi thâo mơn, phrâo rơgao Khul pơlir hơbit anom mă bruă hrŏm tơring čar Dak Lak hmâo pơphun mă yua anom pơdă prưng lăi pơthâo gơnam tam mơ̆ng hơdôm grŭp mă bruă hrŏm, anom mă bruă hrŏm hăng hơdôm mơta gơnam OCOP. Anom sĭ mơdrô dưi pơdŏng ƀơi mrô 88 jơlan Điện Biên Phủ, phường Thành Công, plơi prong Buôn Ma Thuột, pơdă sĭ 151 djuai gơnam mơ̆ng 25 bôh Anom mă bruă hrŏm amăng tơring čar. Anih sĭ mơdrô pơdă prưng hơdôm gơnam mơ̆ng grŭp mă bruă hrŏm, Anom mă bruă hrŏm hăng hơdôm gơnam OCOP amra jing anih tô nao rai jơlan sĭ mơdrô ba glăi bôh tơhnal kơplah wah hơdôm Anom mă bruă hrŏm hăng hơdôm bơnah blơi gơnam, pơpha hyu hăng mơnuih blơi yua.

Phrâo anai, Jơnum min mơnuih ƀôn sang tơring čar Dak Lak ăt hmâo pơphun mơn mông Jơnum klah čun ƀơƀiă 3 thun pok pơhai Kơčăo bruă pơđĭ kyar bơwih ƀong hrŏm, anom mă bruă hrŏm rơwang 2021-2025 hăng Jơlan hơdră mă bruă mơ̆ng Jơnum min mơnuih ƀôn sang tơring čar ngă tui klah čun mơ̆ng Ding jum kơđi čar kơ pơplih phrâo dong, pơđĭ kyar hăng pơđĭ tui bôh tơhnal bơwih ƀong khul amăng rơwang phrâo.

Amăng 3 thun blung a pok pơhai Kơčăo bruă pơđi kyar bơwih ƀong grŭp, anom mă bruă hrŏm, tơring čar Dak Lak hmâo djru pơdŏng phrâo laih 57 bôh anom mă bruă hrŏm; djru hơdôm anom mă bruă hrŏm măi mok mă yua, mă yua pơplih phrâo hơdră mă yua, pơjing anăn gơnam, pơjing jơlan pơlir hơbit ngă rai gơnam phun ƀơi tơring čar... hăng abih bang prăk mă yua rơbêh kơ 6 klai prăk. Hơdôm hơdră bruă pơkon kah hăng djru ba mơnuih mă bruă hlăk ai nao mă bruă ƀơi kual bơwih ƀong khul grŭp; hrŏ trun prăk apah yua lŏn, wual hnưh apah; djru tuh pơplai kơ anom mă yua pơkra gơnam kơ hơdôm bôh anom mă bruă hrŏm gah đang hmua... dưi hmâo hơdôm gưl, gơnong bruă, tơring glông, plơi prong ngă tui. Keh prăk pơđĭ kyar anom mă bruă hrŏm tơring čar Dak Lak hmâo pơsir laih brơi 32 bôh anom mă bruă hrŏm čan rơbêh kơ 19 klai prăk; Keh prăk djru pơsir bruă mă glăk brơi 8 bôh anom mă bruă hrŏm čan rơbêh kơ 1 klai prăk.

Ơi Nguyễn Thiên Văn, Kơ-iăng Khua Jơnum min mơnuih ƀôn sang tơring čar Dak Lak brơi thâo, lu ñu anom mă bruă hrŏm, grŭp mă bruă hrŏm ƀơi tơring čar hmâo hơdră anet, prăk ƀiă, rơwang mă bruă ƀu prong; tơhnal pơlir hơbit dô̆ tơdu. Kiăng hmâo djơ̆ tui tơhnal pơkă truh thun 2030, tơring čar hmâo năng ai ñu 800 bôh anom mă bruă hrŏm hăng 1.000 grŭp mă bruă hrŏm, ơi Nguyễn Thiên Văn brơi thâo:

 “Amăng rơwang pơ̆ anăp kiăng pơtrut kơtang hloh dong bruă pơdŏng, hơkrŭ đĭ anom mă bruă hrŏm tui Tơlơi phiăn Anom mă bruă hrŏm thun 2012 hăng pơ̆ anăp anai lơ 1/7/2024 amra pok pơhai ngă tui Tơlơi phiăn Anom mă bruă hrŏm thun 2023. Amăng Tơlơi phiăn Anom mă bruă hrŏm thun 2023 hmâo 8 djuai hơdră bruă hăng bruă măi mok hmâo djru pha ra. Gưl Ping gah, gong gai hơdôm Gơnong bruă, anom bruă khom đing nao ngăn rơnoh pioh djru mơnuih ngă đang hmua hluai tui pơphun pơ ala mơ̆ng gơñu, hmâo tui anun lĕ bruă mă yua pơplih mrô, mă yua bôh thâo phrâo, mă yua hơdôm tơlơi pơkă djơ̆, hơdôm tơlơi kơ pơkra rơnoh amăng bruă ngă đang hmua rim gơnong bruă gơnam tam tui anun mơ̆ng dưi pơplih ƀơi tơring čar”.

Djơ̆ mơn tơdah pơtŏng sit, hơdôm thun rơgao bruă bơwih ƀong grŭp khul ƀơi Dak Lak hmâo pơđĭ kyar gah mrô hăng pơđĭ tui klă, djru prong amăng bruă pơplih mrô hơdră ngă đang hmua, pơđĭ tui nua gơnam, djru pơplih ƀô̆ mơta plơi pla./.