Amăng mông jơnum, ƀing khua mua hmư̆ ƀing  apăn bruă lăi pơthâo 2 boh tơhnal: Hơdôm bruă hrŏm amăng pôr pơhing hơdră bơdjơ̆ nao prong kơ bruă prap lui hơdră kiăng pôr pơhing; laih dong akŏ bruă pok pơhai ngă tui bruă pôr pơhing črăn hơdră tui hơdôm tơhnal “Pơphun pôr pơhing hơdră bơdjơ̆ nao prong tơl mơnuih mơnam amăng bruă čih pơkra hră pơ-ar djơ̆ tơlơi phiăn rơwang thun 2022-2027” hăng bruă jao, hơdră ngă tui pơ anăp anai.

Hrŏm hăng anun, ƀing khua mua ăt hmư̆ hăng pơlăi nao rai boh thâo amăng čih pơkra hră pơ-ar pôr pơhing hơdră bruă hăng boh thâo pôr pơhing hơdră bruă amăng hơdôm anom bruă pôr pơhing. Ƀing khua mua hăng ƀing apăn bruă ăt pơčrông sai lu bruă yôm phun, kiăng hloh amăng pok pơhai ngă tui bruă jao ƀơi ƀon lan. Amăng anun, hơdôm tơlơi tơnap tap, gun găn mơng ƀing khua mua ăt hơmâo ƀing apăn bruă lăi glăi, črâo brơi tong ten.