Dak Lak hơmâo anŏ gêh găl kơ lơ̆n mơnai, boh troh đang hmua hăng anih dŏ gêh găl pơtruh nao rai kual Dap Kơdư hăng djop tơring čar ter hang ia rơsĭ dơnung Tong krah. Khă tui anun, kiăng pơđĭ tui tơlơi kơtang pơhno sĭ mơdrô, tơring čar kiăng pơblih mơ̆ng tơlơi ưh kơnang boh troh gơnam đang hmua ƀudah kơnang kơ anŏ gêh găl thâo thăi mơ̆ng hlâo, khom ba yua boh thâo ia rơgơi hăng rơnoh sĭ mơdrô đĭ lu.

Ƀơi mông jơnum, lu khua mua pơčrâo rơđah, anŏ dŏ kơƀah prong lĕ tơlơi ngă hrŏm, pơtruh nao rai kơsem min boh thâo ia rơgơi phrâo hăng anŏ či kiăng sit nik aka ƀu djơ̆ lăp hăng aka ƀu tong ten ôh. Lu boh tơhnal kơsem min giong aka ƀu ngă tui, ba yua amăng bruă mă ôh, lơ̆m anun lu sang bruă mơdrô, sang bruă ngă hrŏm dŏ tơnap kiăng bưp ƀing mơnuih rơgơi kơhnâo, boh tơhnal kơsem min či ba yua amăng bruă mă. Lu tơlơi pơmin lăi pơthâo, či pơphun bruă mă ăt tơnap tap ƀu hơmâo anih pơđĭ kyar hăng prăk djru tui klôn. Kiăng plai ƀiă anŏ pleh ploh mơ̆ng kơsem min truh kơ boh tơhnal ba yua sit nik, lu mơnuih rơgơi kơhnâo rơkâo brơi pơtrut kơtang bruă ngă hrŏm Kơnuk kơna-sang hră-sang bruă mơdrô, pơtrut tơlơi gơgrong ba mơ̆ng djop khul grup, anom bruă ngă gong jơlan, pơphun ba yua hăng sĭ mơdrô boh tơhnal giong kơsem min, biă mă ñu amăng bruă ngă phun kơsem min gah bruă kơphê, tiu, sầu riêng.