Jơnum min mơnuih ƀôn sang tơring čar Dak Lak hơmâo hră pơtrun mrô 25/2026 rơkâo kơ anom bruă Pơtô hăng Pơjuăt hrŏm hăng lu plơi pla, hyu sem lăng, pel ĕp bruă ngă tui pơhrui prăk apah hrăm hră ƀơi djop sang hră; pơsir khut khăt mơtam hlơi pô ngă soh tơlơi phiăn. Djop mơta prăk či pơhrui mă, pơgôp hrŏm khom djơ̆ tơlơi kiăng hăng pơhaih tong ten, brơi čơđai thâo, amĭ ama čơđai sang hră pô krăp lăng.

Lơ̆m tơring čar Dak Lak ngă tui bruă pơhrŏ hĭ mrô khua mua sang hră, pơmut glăi lu sang hră jing sa, djop sang hră ăt ngă tui djơ̆ tơlơi pơtrun djru kơ čơđai sang hră, biă mă ñu čơđai sang hră kual ataih, kual tơnap tap, plơi pla mơnuih djuai ƀiă; ƀu lui kơ bruă pơgôp prăk amăng akŏ thun hrăm mơ̆ jing anŏ ngă kơtrâ̆o kơ čơđai sang hră, amĭ ama čơđai sang hră.

Gơnong bruă Pơtô hăng Pơjuăt tơring čar Dak Lak pơtrun hiăp brơi ngă tui djop jơlan hơdră djru ba čơđai sang hră, biă mă ñu čơđai sang hră ƀun rin, dŏ ƀơi kual ataih, mơnuih djuai ƀiă; ƀu lui bruă pơhrui prăk apah hrăm hră amăng akŏ thun, sa tơlơi bơngơ̆t mơ̆ng lu sang anŏ. Hrŏm hăng anun, Gơnong bruă pơtô hăng pơjuăt brơi pơhaih rơđah rơđong mrô telephôn pioh iâu nao lăi pơthâo tơlơi pơhing pơpă ngă soh glăi tơlơi pơtrun mơ̆ng kơnuk kơna amăng bruă pơtô hrăm, pơhrui prăk apah tă tăn.

Yă Lê Thị Thanh Xuân, Khua Gơnong bruă Pơtô hăng Pơjuăt tơring čar Dak Lak, brơi thâo, anom bruă hơmâo ngă hră pơar pơtrun hiăp brơi ngă tui djơ̆ hră pơčrâo ba yua prăk, pơhrui prăk, wai lăng kông ngăn, jao glăi djop tơdơi kơ pơmut sang hră hăng djop mơta tơlơi hơmâo pơhrui prăk kăk brơi thâo rơđah amăng akŏ thun hrăm phrâo. Gơnong bruă Pơtô hăng pơjuăt tơring čar Dak Lak, pơtrun hiăp djop sang hră, anih pơtô hrăm ngă t6ui djơ̆ tơlơi pơtrun mơ̆ng akŏ thun mơtam; sang hră pơpă ngă soh glăi lĕ khom nao sem lăng, ƀư̆ pơkra glăi hăng pơsir djơ̆ tơlơi phiăn.

“Lu tơlơi pơdjơ̆ nao kơ rơnoh prăk pơhrui mă mơ̆ng akŏ thun lĕ ƀing gơmơi hơmâo pơtô brơi djop sang hră pơphun ngă tui djơ̆, tong ten. Hơdôm mơta rơnoh prăk pơhrui mă amăng akŏ thun hrăm phrâo ăt khom hơmâo hră pơtrun čih pơkra glăi brơi djơ̆ găl, huăi hơmâo tơlơi ngă soh glăi, jak iâu pơhrui prăk tă tăn, hơdôm tơlơi ngă tơnap pơhrui prăk kăk, ngă bơngơ̆t kơ sang anŏ čơđai sang hră khom pơgăn tañ, hmao kru”.