Ƀơi plơi Đắk Snao, să Quảng Sơn, kual him lăng amra ƀuh lŏn tơhroh prong rơbêh 4 ektar, bơdjơ̆ nao 79 boh sang anŏ hăng 454 čô mơnuih. Abih tih 79 boh sang anŏ hơmâo gong gai ƀon lan ba nao dŏ pơ anih pơhlôm rơnuk rơnua. Jơnum min mơnuih ƀon sang tơring čar Lâm Đồng lăi pơthâo ječ kơ tơlơi truh sat pơ kual anai.

Bơi să D’ran, čroh ia Cát rô čơtăng ngă tơhroh ƀơi tơkai tơdrông ƀêtông ƀơi ƀut plơi Ga, thôn Phú Thuận, ngă 8 boh sang anŏ hăng 35 čô mơnuih ia guang dar. Gong gai ƀon lan hơmâo pơkiăo nao mơnuih, gơnam măi mok nao kuăi pơkra anih lŏn tơhroh, pok jơlan jang jai, ba đuăi mơnuih mơng kual hŭi rơhyưt hăng pơphun dŏ gak, pơhŭi hlâo. Lơm anun, amăng dua hrơi mơtăm amăng tlam kơnôl 19 hăng 20/9, lŏn pơtâo mơng taluy rôk jơlan čun čoe Prenn, phương Xuân Hương-Đà Lạt tơhroh trun jơlan glông.

Anom bruă bơdjơ̆ nao ječ ameč nao črâo brơi rơdêh đuăi nao rai, ba nao rơdêh kuăi rơmet đuăi lŏn pơtâo, pơhlôm rơnuk rơnua brơi mơnuih hăng rơdêh nao rai. Ƀơi anăp kơ tơlơi hŭi rơhyưt mơng hơjan hlim, Jơnum min mơnuih ƀon sang tơring čar Lâm Đồng rơkâo djop ƀon lan guang dar kual hŭi rơhyưt, pơkiăo nao mơnuih dŏ gak, ba đuăi mơnuih ƀôn sang hăng pơhlôm djop gơnam yua, mơnong ƀong huă.