Jơnum min mơnuih ƀôn sang tơring čar Dak Lak phrâo pơphun mông jơnum jŭ yap, sem glăi rơnoh pok pơhai bruă mă, ngă tui bruă jao kơsem min ia rơgơi phrâo, pơblih pơčeh phrâo hăng ba yua mrô amăng tơring čar, pơtum nao pơčrong sai, brơi pơsir tơlơi tơnap tap kiăng pơhlom bruă ngă djơ̆ tơhnal pơkă bruă pơtrun laih hlâo. Črăn mơ̆ng thun 2023-2026, tơring čar hơmâo pok pơhai brơi kơsem min 21 mơta kơčăo bruă boh thâo hăng ia rơgơi phrâo gưl tơring čar hăng rơnoh prăk truh kơ 37 klai, pioh tuh pơ alin kơ bruă pơčeh phrâo, kơsem min, gơnam pơkra ming, pơjing ia jrao akha kyâo hăng pơblih ba yua ia rơgơi mrô. Mơ̆ng thun 2021 truh ră anai, hơmâo ngă tui 19 kơčăo bruă phun gah boh thâo ia rơgơi tơlơi pơhing thâo yua măi komputer hăng atur mrô. Kơnong thun 2026 lĕ, tơring čar pioh lui 300 klai prăk pioh tuh pơ alin kơ hơdôm kơčăo bruă phrâo bơkơtang tui glông hrĕ dăng kông, pok jơnum mơ̆ng ataih, bơlăng nao rai amăng tivi, pơdưm ƀơi să, phường, djop mơta anăn, mrô rơnoh čih pioh djă pioh pơmut amăng komputer, mơ-it amăng plang ia rơgơi mrô, truh pơ bruă git gai pơčrâo bruă, mơ-it tơlơi pơhing git gai amăng plang internet soh, git gai pơgang rơnuk rơnua hơđong mơnuih mơnam ăt hnun mơ̆n.

Yă Hồ Thị Nguyên Thảo, Kơ-iăng khua Jơnum min mơnuih ƀôn sang tơring čar Dak Lak rơkâo djop gơnong bruă, sang bruă ƀơi tơring čar hăng djop phường, să khom pơtong rơđah bruă mă, glăm ba brơi pơsir tơlơi dŏ kơđông, kiăng pơđĭ tui boh tŭ yua mơnuih mă bruă thâo rơgơi hăng pok pơhư prong hloh tŭ yua lu.

“Rim kơ gơnong bruă, djop gưl khom pơtong rơđah bruă mă, ngă tui Hră pơtrun mrô 57 gah anom bruă ta pô hăng dăp hơdră tum teč hloh tui hăng atur 8 mơta tơlơi jŭ yap prong djơ̆ găl hăng boh thâo ia rơgơi, pơčeh phrâo mơ̆ anom bruă ping gah tơring čar hơmâo pơsit brơi laih, Khul khua git gai brơi kơnang kơ anun hăng Jơnum min mơnuih ƀôn sang tơring čar brơi pơphun ngă tui. Rơngiao kơ jơlan hơdră tơlơi pơkă hră pơtrun mơ̆ng Gơnong dlông lĕ kiăng hơmâo jơlan hơdră hră pơtrun hơgĕt khom rơkâo anom bruă khul pơ ala mơnuih ƀôn sang čih hră pơtrun mă bruă, đing nao hlâo hloh atur ba yua ia rơgơi mrô, ba tơlơi pơhing tañ, gơnam yua mă bruă ba yua ia rơgơi phrâo kơ djop sang bruă. Krăp lăng na nao rim rơwang hrơi tơjuh, djop bruă mă jao tum teč khom ngă tui djơ̆ mông pơkă, akŏ bruă khom pơdah thâo djop tum teč kiăng ngă giong abih tơhnal pơkă bruă jao”.Pơdjơ̆ nao kơ bruă ba yua ia rơgơi mrô, Gơnong bruă Boh thâo hăng ia rơgơi phrâo tơring čar Dak Lak phrâo ngă bruă hăng Sang hră gưl prong Đại học Tây Nguyên, tŭ ư hĭ pơtrut bruă pơtô hrăm gưl dlông jing Thạc sĩ, nai prin tha TS gah bruă kơsem min ia rơgơi tơlơi pơhing, djă pioh mrô hăng ia rơgơi gah mơnong hơdip; lir hơbit hăng bruă kơsem min, pơtô hrăm, hrăm ngă ui sit nik ƀơi sang bruă pơtô yua tơring čar wai lăng. Nai prin tha Đinh Hữu Hùng, Khua anom gah bruă pơkra ia jrao gun, Sang hră gưl prong Đại học Tây Nguyên lăi lĕ, hơdôm kơčăo bruă kơsem min kiăng kiăo tui tơlơi gêh găl, anŏ či kiăng mơ̆ng bruă mă sit nik hnun kah dưi ba glăi boh tŭ yua sit nik kơ mơnuih ƀôn sang.

“Kâo pơmin lĕ hơdôm kơčăo bruă pơ anăp anai, tơdah gơnong bruă Boh thâo hăng ia rơgơi phrâo kĭ hră kơsem min hrŏm sang hră gưl prong, khom kiăo tui anŏ kiăng sit nik anŏ phara hơjăn ƀơi tơring čar. Biă mă ñu, tơdơi kơ pơmut glăi, hơdôm boh yom phun ăt khom kiăo tui kơ anŏ kiăng phara pơ kual gah Ngŏ tơring čar. Laih anun, hơdôm boh yom phun ră anai amăng Hră pơtrun 72 ăt lăi nao ming pơkra glăi ƀudah pơđĭ kyar amăng bruă ia jrao. Ƀing ta khom kiăo tui tơlơi anun kơsem min lăi pơthâo boh tơhnal kơsem min hnun kah amra ba glăi boh tŭ yua sit nik kơ mơnuih ƀôn sang”.

Tui hăng ơi Phạm Gia Việt, Kơ-iăng khua Gơnong bruă Boh thâo hăng Ia rơgơi phrâo tơring čar Dak Lak, bruă pok pơhai ngă tui Hră pơtrun 57 amra pơkă tơhnal kiăng ngă dlông hloh, pơtô hrăm mơnuih thâo mă bruă, bơwih brơi kơ bruă pơblih ba yua ia rơgơi mrô hăng pơđĭ kyar bơwih ƀong huă-mơnuih mơnam.

"Amăng Hră pơtrun mrô 57 lĕ bruă pơblih yua mrô hăng pơtô hrăm kơ ƀing apăn bruă thâo ba yua ia rơgơi mrô, pơ anăp anai, ảma pơtrut kơtang hloh. Biă mă ñu lŏm ruah akŏ bruă, tơlơi či kơsem min pioh pơgôp hrŏm bruă pơđĭ kyar bơwih ƀong huă mơnuih mơnam, djru ngă pơđĭ tui rơnoh đĭ kyar dưi ngă djơ̆ tơhnal pơkă dua mrô mơ̆ng tơring čar Dak Lak hơmâo pơtrun či ngă".

Hrŏm hăng anun, Khul git gai wai lăng Anih Ngă hmua ba yua ia rơgơi phrâo ƀôn prong Hồ Chí Minh, ngă hrŏm gơnong bruă Boh thâo hăng Ia rơgơi phrâo Dak Lak, pơphun Tal pơplông hơduah ĕp “Pơphun bruă mă pơblih pơčeh phrâo amăng bruă ngă hmua pla pơjing, ba yua ia rơgơi thun 2026” amăng kual Dap Kơdư hăng akŏ ñu “Bruă ngă hmua pơhlom akŏ klôn-Pơjing rai bruă ngă kơñ pơgi mơtah”. Tal pơplông, anăp nao bruă hơduah ĕp hơbô̆ bruă ba yua ia rơgơi mrô, pơjing rai măi mă bruă hơjăn hăng ba yua boh thâo ia rơgơi gah mơnong hơdip, kiăng pơđĭ tui rơnoh gơnam đang hmua, pơđĭ kyar bruă ngă hmua hơđong kơjăp. Pri sa apah kơ pô hlơi, mơnuih mă bruă, sang bruă hơmâo anŏ pơčeh phrâo tŭ yua hloh hăng rơnoh pri apah bơni 150 klăk prăk; lu kơčăo bruă hơmâo tơlơi gêh găl, tŭ mă prăk djru lu hloh truh 400 klăk prăk, kiăng rah pơtem pơjeh hiam klă hăng pơđĭ kyar.

Ơi Nguyễn Thanh Hiền, Kơ-iăng khua khul wai lăng Anih ngă hmua ba yua boh thâo ia rơgơi ƀôn prong Hồ Chí Minh brơi thâo, tal pơplông anai, jing mông gêh găl pơtruh nao rai ƀing thâo bruă pơdjru nao rai plah wah ƀôn prong Hồ Chí Minh hăng hơdôm tơring čar kual Dap Kơdư, pơtrut pơjing rai anih pơgang mơnong hơdip pơčeh phrâo amăng bruă ngă hmua.

“Amăng črăn phrâo rơnuk anai, hăng Hră pơtrun 57 lĕ ƀing ta hơmâo anŏ gêh găl pơtrut ba yua boh thâo ia rơgơi phrâo, amăng anun hơmâo lu lu kơčăo bruă dưm truă măi mok mă bruă mă hơjăn pơkra ming, ngă hmua, laih anun dưm ia rơgơi AI, mă gru pơkă ngă hmua pioh pla pơjing kiăng pơđĭ tui rơnoh sĭ mơdrô boh troh đang hmua. Yua kơ anun, ƀing gơmơi ngă hrŏm Gơnong bruă Boh thâo hăng Ia rơgơi tơring čar Dak Lak pơphun tal pơplông gah bruă anai kiăng hơduah ĕp tơlơi pơmin pơčeh phrâo, mơ̆ng anun djru ba ƀing gơñu pơđĭ kyar, pơkra ming tui kơčăo bruă kơsem min mơ̆ng gơñu pô, biă mă ñu ba yua boh thâo ia rơgơi anun amăng bruă mă sit nik pioh akŏ pơdong san gbruă mơdrô pơkra ming, thâo rơgơi hloh pioh pơtrut rơnoh gơnam sĭ mơdrô pơmă hloh sit pĕ pơhrui boh troh dang hmua hăng sĭ mơdrô pơ tač rơngiao”.

Hăng bruă pơtrut ngă tui djơ̆ rơ-ua hloh, pơblih pơčeh phrâo laih anun ba yua mrô, Dak Lak hrŏm hăng hơdôm tơring čar kual Dap Kơdư hlăk bơblih tui ƀơƀrư̆, pơtrut pran jua phrâo pioh pơđĭ kyar, djru hrŏm ngă tui tum teč tơhnal pơkă pơđĭ kyar hmar, hơđong kơjăp amăng rơnuk hrưn đĭ phrâo kơ lŏn ia ta.