Ƀơi Anom mă bruă čar să Hoà Phú, tơring čar Dak Lak, hơdôm hrơi akô̆ blan 7 hmâo laih lu mơnuih ƀôn sang nao ngă hră pơ-ar. Ngă giong bruă lăi pơthâo hră pơ-ar tui jơlan măi mok hăng čơkă mă hră brơi glăi bôh tơhnal, ơi Nguyễn Thế Lâm, ƀơi thôn 9, să Hòa Phú, lăi pơthâo, khă hơdôm hrơi blung a mă bruă tui hơdră phrâo samơ̆ hmâo laih hơdôm tơlơi pơplih klă amăng bruă pơsir hơdôm mơta hră pơ-ar.

“Tơlơi klă hloh lĕ kâo ƀuh phara hăng hlâo, anun lĕ hlâo adih dô̆ tơguan, laih anun djop mơta hră pơ-ar lu mơta ba nao pơ̆ anai ba nao pơ̆ adih samơ̆ ră anai kah hăng pơplih mrô glăk pơdah amăng bruă mă, rim bruă mă rim hrơi mơ̆ng ƀing ta. Mă yua mrô amăng hră pơ-ar dưi pơsir tañ rơbô̆t hăng ba glăi bôh tơhnal prong".

Tui hăng anun, ƀơi Anom mă bruă čar phường Buôn Ma Thuột, tơring čar Dak Lak, mơnuih ƀôn sang dăp glông pioh mă mrô kiăng ngă hră pơ-ar. Ơi Vũ Đức Hưởng, ƀơi phường Ea Kao, tơring čar Dak Lak brơi thâo, khă thâo hrơi anai gong gai 2 gưl sit nik mă bruă, djop mơta hră pơ-ar amra ƀơi anăp ngă ƀơi phường anih pô dô̆, samơ̆ yua kơ juăt laih anun ñu nao pơ̆ anom mă bruă čar hơđăp mơ̆ng plơi prong Buôn Ma Thuột hlâo adih pioh ngă hră pơ-ar. Ñu lăng djơ̆ pran jua biă yua kơ hơdôm mơta hră pơ-ar leng kơ dưi pơplih phrâo, mơ̆ng bruă mă mrô yap tui akô̆ tlôn truh kơ mơnuih mă bruă tŭ mă hră pơ-ar, brơi glăi bôh tơhnal hră pơ-ar.

“Kâo rai pơ̆ anai pioh pơplih hră pơ-ar lŏn mriah jing hră mriah ƀơƀiă. Yua kơ ƀơi anai kâo ngă juăt laih hăng arăng ngă tañ biă anun kâo rai pơ̆ anai ngă hră pơ-ar. Lăi hrŏm bôh pơhiăp pơhiăp phara ƀiă, bruă mă ñu ăt phara ƀơƀiă mơn, samơ̆ ƀơƀrư̆ ăt amra juăt mơn. Tơdơi anai amra jing mơnuih apăn bruă pơtô ba thơ kâo thâo anih anom dô̆ pơ̆ hơpă lĕ amuñ hloh. Ră anai phrâo hrơi blung a lĕ kâo ăt nao pơ̆ anih hơđăp mơn pioh ngă hră pơ-ar”.

Hơdôm hrơi rơgao, kah hăng abih bang mơnuih ƀôn sang nao pơ̆ hơdôm bôh anom ngă hră pơ-ar ƀơi hơdôm bôh să, phường ƀơi Dak Lak pioh ngă tui hơdôm mơta hră pơ-ar kiăng hloh, kah hăng: hră pơsit hrơi tơkeng, lăi pơthâo mơnuih djai, hră pơgang gah ia jrao, ngă hră mut hrăm, pơsit anih anom dô̆, hră pơ-ar lŏn drŏn... Kiăng djru brơi mơnuih ƀôn sang, ƀing apăn bruă, mơnuih mă bruă ƀơi anom mă bruă čar ăt hmâo gir abih bang pran jua, ngă juăt hăng abih bang anih anom yua hrŏm amăng mă bruă gong gai 2 gưl.

Ơi Nguyễn Đăng Huy, mơnuih mă bruă ƀơi Anom mă bruă čar să Hòa Phú, tơring čar Dak Lak lăi pơthâo, mơ̆ng hrơi mă bruă lông lăng tui hơdră phrâo, ƀing apăn bruă, mơnuih mă bruă ƀơi anom kah hăng ƀu hmâo hrơi pơdơi. Abih bang mă bruă truh kơ mlăm pioh pơsit abih bang mrô djă pioh, mă yua abih bang hruaih, djơ̆ tui tơlơi kiăng mơ̆ng mơnuih ƀôn sang.

“Abih bang ƀing mă bruă ƀơi Anom mă bruă čar să Hòa Phú phrâo rai mơ̆ng lu mơnuih apăn bruă mơnuih mă bruă anun bruă tŭ mă, thâo kơjăp, mă bruă lông lăng lĕ, phun ñu hơđong samơ̆ lơm pơphun ngă sit mơ̆ng mơguah truh ră anai ăt lĕ hơdôm mơta kah hăng mrô djă pioh bơdjơ̆ nao bruă ngă hră pơ-ar dô̆ phrâo anun bruă tŭ mă, pơsir ăt bưp tơnap mơn, samơ̆ adơi ayong ăt glăk gir run pơsir mơn”.

Ƀơi hơdôm bôh să, phường pơ̆ tơring čar Dak Lak amăng hơdôm hrơi anai, hơdôm grŭp mơnuih juăt bruă măi mok hăng mơnuih mă bruă măi mok mơ̆ng Anom dăng kông Dak Lak (VNPT) ƀơi anăp djru mơnuih apăn bruă, mơnuih mă bruă mă yua măi mok kơ bruă čar ăt kah hăng djru mơnuih ƀôn sang nao ngă hră pơ-ar mơn.

Tui hăng ơi Nguyễn Nam Quốc, Khua Sang dăng kông Dak Lak, anom ăt djru mơn hơdôm anom mă yua djă pioh mrô djru mơnuih ƀôn sang dưi ngă hơdôm bruă mă mơ̆ng ataih. Hăng tơring čar Dak Lak phrâo, bruă pơhrăm, pơtô ba mơnuih apăn bruă, mơnuih mă hơdôm bôh anom să, phường amăng mă yua măi mok hrŏm dưi pok pơhai mơ̆ng hlâo, biă ñu hăng hơdôm bôh să, phường gah tơring čar Phú Yên hlâo adih. kiăng lơm pơplih mă yua măi mok mă yua hrŏm lĕ gơñu amra dưi mă yua ƀơi anih mă bruă mơtăm. Ơi Nguyễn Nam Quốc brơi thâo:

“Kah hăng ƀơi tơring čar Dak Lak, rim bôh să phường leng kơ dưi pơpha ƀiă biă ñu 2 čô mơnuih mă bruă gah măi mok hăng sa čô mơnuih mă bruă măi mok pioh prăp lui djru gum, ƀu pioh hmâo hơdôm tơlơi kah hăng rơngiă jơlan lăi pơthâo nao rai, rơngiă tô nao rai ƀơi hơdôm anih anom mă bruă hăng mơnuih ƀôn sang. Rơngiao kơ anun VNPT Dak Lak ăt glăk pơjing mơn hơdôm grup djru bruă tañ hăng hơdôm mrô hotline pioh abih bang hơdôm anih anom mơ̆ lơm hmâo tơlơi hơget wot jơlan tô nao rai anom mă yua, ăt kah hăng tơlơi djru bruă kơ mơnuih ƀôn sang mơ̆ hmâo tơlơi gun lĕ amra dưi djru hmao tlôn tañ”./.