Hrơi rơnuč blan 10, giăm hmâo 20 čô mơnuih apăn bruă tơhan hăng tơhan polih pơgang pơgăn apui ƀong hăng pơtlaih mơnuih Kông ang tơring čar Dak Lak hrŏm hăng hơdôm bôh sang anô̆ ƀuh ƀô̆ ƀơi lan sang B Hoàng Anh, jơlan Nguyễn Công Trứ, plơi prong Buôn Ma Thuột pioh găn rơgao lăng bruă bŏng glăi hăng anih apui ƀong ƀơi tal dlông mơ̆ng sang anun. Hơdôm mơnuih gum hrŏm hmâo pơtô brơi hơdră mă yua gĕt pơgang apui ƀong, đing ia čruih apui, yua rơñan hrĕ pơtlaih mơnuih dô̆ đôm amăng anih apui ƀong, djru pơjrao brơi mơnuih lơm bưp tơlơi truh... Ơi Bùi Huy Phước – Khua pơ ala Grŭp wai lăng mă yua sang dô̆ lu mơnuih Hoàng Anh brơi thâo, rim thun anom bơwih ƀong leng kơ pơphun lăi pơthâo, pơhrăm brơi bruă pơgang, pơgăn apui ƀong hăng pơtlaih mơnuih truh hơdôm bôh sang anô̆ mơnuih ƀôn sang dô̆ hơdip amăng hơdôm bôh sang prong lu sang anô̆ dô̆. Rơngiao kơ anun dô̆ hyu lăi pơhing, pơsur djop mơnuih ngă tui tơpă hơdôm tơlơi pơkă hăng dưm truă tum djop mơta măi mok pơgang, pơgăn apui ƀong.

 “Grŭp wai lăng sang dô̆ lu sang anô̆ gum hrŏm hăng anom bruă pơgang, pơgăn apui ƀong tal sa lĕ lăi pơhing hăng tal dua lĕ rơkâo hơdôm bôh sang anô̆ hmâo war rông rơmung hmâo bah amăng pơtlaih lĕ khom tañ pơsir pơkra bah amăng tơgloh tơbiă lơm hmâo tơlơi truh. Tal phrâo rơgao lu anih mơnuih ƀôn sang dô̆ hmâo pơkra, bơ̆ sa dua bôh sang anô̆ akă pơkra ôh mơ̆ ƀu ƀuh ƀô̆ amăng hơdôm hrơi anai lĕ, ƀing gơmơi pơsur dong, rơkâo gơñu pơkra lơm glăi pơ̆ sang, kiăng lơm hmâo tơlơi truh thơ ta tơtlaih ñu pơhlôm kơ drơi pô hăng sang anô̆”.

Ayong Nguyễn Tuấn Anh, sa čô mơnuih ƀôn sang dô̆ hơdip mơda ƀơi glông Sang B Hoàng Anh – Buôn Ma Thuột mơ̆ng giăm truh 10 thun hăng anai lăi pơthâo, bruă mơnuih ƀôn sang dô̆ dưi prăp lui bôh thâo, pơhrăm bôh thâo pơgang, pơgăn apui ƀong ƀơi anih dô̆ sang dlông tal lĕ kiăng biă. Kiăng lơm ƀu bưng hmâo tơlơi truh apui ƀong, djop mơnuih leng kơ hơđong pran jua mă yua bôh thâo phrâo pioh pơgang drơi pô, gum hrŏm khul pơgang apui bŏng glăi hăng apui ƀong hăng djru djop mơnuih pơtlaih tơbiă mơ̆ng anih apui ƀong. Ayong Nguyễn Tuấn Anh brơi thâo:

 “Sang anô̆ kâo ăt gum hrŏm klă mơn pơhrăm pơgang apui ƀong, hăng ăt rŏng blơi brơi mơ̆n kơ pô hơdôm gơnam yua pơgang apui ƀong amăng sang anô̆ pioh lơm hmâo tơlơi truh amra pơsir hăng pơtlaih mă drơi pô. Kâo ƀuh bruă pơhrăm pơgang apui ƀong anai lĕ sit nik biă, ăt čang rơmang mơn abih bang hơdôm anih mơnuih ƀôn sang dô̆ pơkon lu sang anô̆ khom ƀuh ƀô̆ tum pioh khul pơgang, pơgăn apui ƀong hăng pơtlaih mơnuih gơñu pơhrăm bôh thâo hăng lơm hmâo tơlơi truh lĕ gum hrŏm pơgang pơgăn hăng dưi pơtlaih brơi”.

Tui hăng tơlơi lăi pơthâo glăi mơ̆ng Khul tơhan pơgang pơgăn apui ƀong hăng pơtlaih mơnuih Kông ang tơring čar Dak Lak, mơ̆ng krah blan 12/2022 pơ̆ anăp anai, ƀơi Dak Lak hmâo 17 mơta tơlơi truh apui ƀong, ngă djai sa čô mơnuih, rơka ruă hơdôm pluh čô mơnuih, ngă răm rai kông ngăn mrô prăk rơbêh kơ 5 klai 550 klăk prăk. Mrô tơlơi apui ƀong bơhmu hăng thun hlâo hrŏ trun 3 mơta tơlơi, samơ̆ rơnoh kơtang ñu lĕ đĭ lu, mrô mơnuih rơka ruă lu hloh. Khul pơgang apui ƀong hmâo pơphun lăi pơthâo tơlơi phiăn, bôh thâo pơgang apui ƀong hăng pơtlaih mơnuih kơ hơdôm rơbâo čô mơnuih; pok 101 bôh anih pơhrăm bruă pơgang, pơgăn apui ƀong hăng pơtlaih mơnuih brơi năng ai ñu 9.300 čô mơnuih gah tơhan pơgang hlôm hlâo, grŭp pơgang, pơgăn apui ƀong ƀơi anom bruă, plơi pla...

Trung tá Phùng Việt Đức – Kơ-iăng Khua Anom bruă tơhan polih pơgang, pơgăn apui ƀong hăng pơtlaih mơnuih Kông ang tơring čar Dak Lak pơsit, bruă hơdôm rơbâo čô mơnuih dưi lăi pơthâo brơi, găn rơgao lăng, pơhrăm pơgang, pơgăn apui ƀong hăng pơtlaih mơnuih, gum djru amra pơđĭ tui bôh thâo hăng bôh thâo bơdjơ̆ nao pơgang, pơgăn apui ƀong, pơtlaih mơnuih ăt kah hăng bôh thâo gah djru pơtlaih brơi ƀơƀiă lơm hmâo tơlơi truh. Mơ̆ng anun, plai ƀiă đut hlah răm rai gah mơnuih hăng kông ngăn amăng hơdôm anih apui ƀong. Trung tá Phùng Việt Đức brơi thâo:

 “Hluai tui hơdôm bruă pơhrăm pơgang pơgăn apui ƀong lĕ mơnuih ƀôn sang hăng hơdôm mơnuih lĕ čơđai sang hră, čơđai gưl dlông, mơnuih mă bruă pơđĭ tui bôh thâo gơgrong mơ̆ng drơi pô amăng bruă pơgang, pơgăn apui ƀong hăng thâo hơdôm bruă mă phun pơgang pơgăn apui ƀong pioh kơ sang dô̆ ƀơi sang anô̆, sang dô̆ lu sang anô̆, hơdôm anih anom sang dô̆ prong ƀudah anih čơđai gưl dlông dô̆. Mơ̆ng anai thâo hơdôm hơdră pơgang pơgăn apui ƀong hăng biă ñu bôh thâo pơsir lơm hmâo tơlơi truh apui ƀong ƀudah pơtuh”.

Tơlơi apui ƀong, pơtuh lĕ hơdôm tơlơi truh ƀu hmâo hlơi kiăng ôh, khă hnun hai, ñu amra truh hơbin ƀu thâo ôh. Bruă hmâo bôh thâo hreč, pran jua phing amăng pơgang, pơgăn apui ƀong, pơsir anih apui ƀong lơm phrâo hmâo apui ƀong ăt kah hăng prăp lui bruă tơtlaih mơ̆ng anih apui ƀong lĕ tơlơi kiăng biă hăng abih bang djop mơnuih. Mơ̆ng anun, amra plai ƀiă đut hlah răm rai gah ană mơnuih hăng kông ngăn lơm hmâo apui ƀong truh./.