VOV4.Jarai - Ngă tui jơlan hơdră pơplih mă yua boh thâo mrô amăng bruă sĭ mơdrô, bơwih brơi ƀing tuai klă hloh, mơng blan 7/2022, Kông ti apui lơtrik Dak Lăk glăk pơphun pơplih hră pơ-ar blơi sĭ apui yua (čih amăng hla pơ-ar) hơdai ngă hră amăng điện tử dong. Tui anun, ƀing tuai ƀu kiăng tơguan kĭ glăi hră pơ-ar amăng hla pơ-ar dong tah, kơnong kiăng tut mrô pơsit anăn OTP lơ̆m hơmâo mă tin ñăn mơng anom bruă apui lơtrik tui mrô telephôn ƀing tuai čih pơthâo. Tui anun, mrô tuai hơmâo djă pioh hơnong, anun juăi bơdjơ̆ nao bruă tla prăk yua apui ôh.

Hăng hră amăng glông điện tử, dŏ pơpă tŭ mơn, kơnong kiăng hơmâo internet, ƀing tuai dưi mut lăng glông bơwih brơi ƀing tuai, sem lăng hră pơ-ar yua apui, kiăng pơplih anăn thơ tơdah kiăng, mă yua hơdôm tơlơi bơwih brơi mơng anom bruă apui lơtrik. Ră anai, kông ti Apui lơtrik Dak Lăk hơmâo rơbêh 506.000 čô tuai yua apui amăng sang anŏ. Him lăng truh abih blan 6 thun dơi, kông ti amra pơplih abih hră pơ-ar mơng ƀing tuai jing hră pơ-ar hơmâo pơmut amăng glông điện tử.

Siu H’Mai: Pơblang