Tui hăng tơlơi kĭ pơkôl, hơdôm bơnah amra ngă hrŏm pok pơhai lu hơdră akŏ phun kah hăng đĭ kyar anih anom boh thâo mrô, glông măi wai lăng hăng phun atur hră pơ-ar tơlơi pơhing gah anom bruă pơtô hrăm; mă yua ia rơgơi ană mơnuih pơčeh mă (AI), anih djă pioh tơlơi pơhing, hră pơ-ar prong (Big Data) amăng wai lăng; pơtô hrăm; pơjing rai hơdrôm hră, djŏp mơta gơnam bơwih brơi bruă hrăm hră hăng mrô soh, pơtô hrăm mơ̆ng ataih online, pơtô hrăm rơgơi.

Rơbêh kơ 350 čô khua, nai pơtô apăn bruă ƀơi Dak Lăk hơmâo pơtŏp mă yua AI hăng sem lăng, pơčrang mrô rơnoh; rơbêh 1.500 čô nai, čơđai sang hră hơmâo pơtô kiăng hơdip klă pơhiăp mơak amăng sang hră, laih anun ba yua ia rơgơi mrô amăng sang hră. Tui hăng ơi Lưu Tiến Quang, Kơ-iăng khua Gơnong bruă Pơtô hăng Pơjuăt tơring čar Dak Lăk, bruă kĭ pơkôl ngă hrŏm kiăng pơtrut tui anŏ kơtang mơ̆ng djŏp bơnah, pơtrut mă yua ia rơgơi abih bang bruă amăng anom bruă pơtô hrăm, djru pơplih klă bruă wai lăng, akŏ pơjing anih pơtô hrăm mă yua ia rơgơi mrô, kiăo tui tơlơi kiăng pơplih anih pơtô hrăm amăng rơnuk anai./.