Tui hăng tơlơi lăi pơthâo ƀơi mông Jơnum, mơ̆ng thun 2021 truh ră anai, Dak Lăk hơmâo ƀuh, mă pơkŏng giăm 1 rơbâo wơ̆t tơlơi soh, rơbêh 1.400 čô mơnuih ngă soh hăng ngă soh tơlơi phiăn hot jrao ma túy; mă pơhrui rơbêh 3kg heroin hăng giăm 6kg ma túy djŏp mơta. Tơring čar hơmâo 445 čô mơnuih yua hot jrao ma túy, 866 čô mơnuih gơñ jrao ma túy hơmâo hră pơ-ar krăp lăng. Amăng 3 thun pơphun ngă kơčăo bruă, tŭ yua bruă pôr pơhing pơtô pơblang pơgăn ma túy hơmâo klă tui. Hơmâo pôr pơthâo hăng lu hơdră phara.

Ƀơi mông jơnum, ƀing khua lăi ngă soh gah ma túy jrơi hrơi hơgŏm, bruă pôr pơthâo, pơtô lăi ană plơi kơđiăng, pơkơdong glăi hăng ƀing ngă soh ăt khŏm pơđĭ tui mơn, laih anun pơplih kiăng lăp djơ̆. Amăng anun, kiăng hơmâo tơlơi gum djru mơ̆ng tha plơi, khua plơi, mơnuih ană plơi kơnang hăng ƀing khua đăo đah mơ̆ng pơtô lăi kơ neh met wa thâo hloh hơdôm bruă ngă mơ̆ng ƀing ngă soh gah ma túy.