Ƀơi sang sĭ mơdrô prong Ƀuôn Ma Thuôt, anih pơpha hyu sĭ mơdrô gơnam mơ̆ng hlâo laih prong hloh ƀơi Dak Lak, hơmâo ba pơdă lu mơta gơnam sĭ mơdrô hăng lu mơta djuai gơnam ƀrô amăng hơdôm hrơi či rơnuč thun. Lu biă mă ñu, gơnam sum ao, tơkhŏ jep, ƀañ kĕo....Amai Đoàn Thị Phong, sĭ mơdrô sum ao ƀơi anih B sang sĭ mơdrô prong Ƀuôn Ma Thuôt brơi thâo:

“Thun anai kâo prăp rơmet sĭ mơdrô gơnam têt lu hloh 20% pơkă hăng tơđar thun, kâo ăt pơdă gơnam sĭ mơdrô pioh sĭ glăi tơdơi kơ ƀong têt, ngă yang thun phrâo. Čang rơmang arăng blơi lu hloh, sĭ mơdrô tloh. Nua gơnam sĭ mơdrô thun anai rơgêh ƀiă mơ̆n, gơnam lu mơta. Thun anai, gơnam đang hmua lăi hrŏm amăng tơring čar tŭ yua, gơmơi čang rơmang arăng hyu blơi lu hloh”.

Tui hăng amai Lưu Thị Hồng Hạnh, pô anih sĭ mơdrô pơ anom C, sang sĭ mơdrô prong Ƀuôn Ma Thuôt hơdôm thun giăm anai, tuai blơi gơnam čơkă thun phrâo ƀu lu kah hăng hlâo adih ôh, mơnuih blơi yua arăng đing nao kơ anŏ hiam, tŭ yua mơ̆ng gơnam sĭ mơdrô anun yơh ƀing sĭ mơdrô ruah mă gơnam sĭ mơdrô hơmâo phun tơdŭ rơđah rơđong, sĭ mơdrô gơnam dưi pơhlôm anŏ klă, tŭ yua kơ mơnuih ƀôn sang blơi:

“Rơnoh gơnam sĭ mơdrô thun anai hơđong, rơgêh ƀiă aset đôč. Gơnam thun anai lu mơta. Hrơi blan kâo blơi pơmut gơnam pioh sĭ glăi mơnuih ƀôn sang blơi tết, kâo hơmâo gơnam sĭ mơdrô ƀlir tem soh, hơmâo hră pơkă nua sĭ mơdrô, duh jia, čih anăn gơnam sĭ mơdrô hơdjă rơgoh kah hăng ƀañ kĕo, abih bang gơnam ƀong huă hai hơmâo anŏ pơsit soh, anun yơh mơnuih ƀôn sang hơđong pran jua”.

Bơwih brơi gơnam sĭ mơdrô čơkă ngă yang thun phrâo Tết Giáp Thìn thun anai, ƀing ngă bruă sĭ mơdrô, sang sĭ mơdrô pơprong amăng tơring čar Dak Lak hơmâo prăp lui yơh gơnam sĭ mơdrô, kĭ hră ƀuăn hăng djop anih ba hyu sĭ mơdrô lĕ gơnam pơkra ming hơdjă rơgoh hiam klă soh. Djop siêu thị ƀơi Dak Lak hơmâo pok pơhai lu hơdră pơsur sĭ mơdrô hăng lu hơdră djru nua kah hăng pơtrun nua sĭ mơdrô, pơ alin puang sit blơi gơnam, ƀơk gơnam djru tui klôn, blơi 2 lĕ, sa brơi đôč, kiăng pơsur blơi yua.

Tui hăng ơi Bùi Văn Quân, Khua sang sĭ mơdrô prong siêu thị Go Ƀuôn Ma Thuôt lăi, truh ră anai siêu thị gơñu ngă giong laih bruă prăp lui gơnam sĭ bơyan têt, gơnam prăp lui gơnam ƀong huă, yua rim hrơi hăng rơnoh prăk 32 klai.

“Siêu thị prăp lui akŏ bruă hlâo kơ truh têt dua blan. Thun anai, gơmơi djă pioh gơnam đĭ tui 10% pơkă hăng thun hlâo, hơdră či ngă bruă thun anai gơmơi pơhrŏ gơnam tơpai hăng ƀiêr truh mơkrah rơnoh kiăng amăng anih sĭ mơdrô yua kơ jơlan hơdră pơtrun mơ̆ng kơnuk kơna. Ƀing gơmơi pơđĭ tui hơjai pơđŏm pler pơrơ-ot hăng nao mă bruă tom djop sang ba hyu sĭ mơdrô pioh prăp lui gơnam sĭ mơdrô têt”.

Tui hăng ơi Nguyễn Văn Nghiêm, Kơ-iăng Khua Gơnong bruă wai lăng tuh tia hăng sĭ mơdrô tơring čar Dak Lak, anŏ kiăng blơi yua amăng bơyan têt thun phrâo Giáp Thìn 2024 ƀơi Dak Lak him lăng đĭ tui 15%. Anom bruă tuh tia pơkra ming hăng sĭ mơdrô tơring čar git gai djop sang bruă sĭ mơdrô amăng tơring čar pơdah thâo akŏ bruă djă pioh gơnam sĭ mơdrô lu hloh, gơnam tŭ yua hiam, rơnoh djơ̆ lăp hăng rơkâo djop sang bruă sĭ mơdrô khom ngă hơđong nua, ƀuăn rong ƀu ngă kơƀah gơnam sĭ mơdrô hăng pơđĭ nua ôh. Hrŏm hăng anun, pok pơhai bruă mă pơtrut bruă sĭ mơdrô, pơphun pok jơnum pơdă gơnam sĭ mơdrô ngui ngor mơak, pơdă prưng lăi pơthâo, sĭ mơdrô gơnam hiam yua kơ Việt Nam pơkra ming ba nao truh pơ plơi pla....Ơi Nguyễn Văn Nghiêm, brơi thâo:

“Truh ră anai hơmâo 11 boh sang sĭ mơdrô  čih anăn ngă hrŏm hơdră hơđong nua gơnam sĭ mơdrô gơnam yua rim hrơi. Rơnoh prăk abih tih 500 klai, aka ƀu yap ôh ƀing ngă bruă sĭ mơdrô, sang anŏ mơnuih oôn sang ăt pok bah amăng ngă gêh găl brơi sĭ mơdrô amăng tơring čar. Thun anai, hơmâo tơlơi gêh găl hloh, anun lĕ ƀing ngă bruă sĭ mơdrô prăp lui gơnam anih či blơi, prăp lui lu mơta gơnam sĭ mơdrô pơhlôm hơdjă mơnong ƀong huă. Laih dơ̆ng, ƀing gơmơi ăt ngă bruă hăng djop sang sĭ mơdrô, anih pơpă kơƀah gơnam sĭ mơdrô lĕ amra ba nao gơnam sĭ mơdrô bơwih brơi tơl plơi pla sit mơnuih ƀôn sang či kiăng”.

Bruă prăp rơmet lui hlâo tong ten mơ̆ng sang sĭ mơdrô anet raih daih, sang bruă sĭ mơdrô hăng anom bruă kơnuk kơna djru hrŏm sa tơlơi bơkơnăl pơtrut blơi yua, ngă gêh găl klă hloh kơ mơnuih ƀôn sang tơring čar Dak Lak čơkă têt mơak, ngă yang thun phrâo trơi pơđao yâo mơak, rơnuk rơnua.