Hơdôm anih plĕ hră tañ hơmâo ngă ƀơi să Hòa Phú, Buôn Đôn, Ia Rvê, Ia Lốp hăng hơdôm boh phương Buôn Ma Thuột, Bình Kiến. Ƀing nao plĕ hră lĕ ƀing khua, tơhan amăng Anom bruă git gai tơhan tơring čar, Tơhan pơgang guai hăng Kông an tơring čar. Hrơi nao plĕ hră mơ̆ng 7 mông mơguah truh 7 mông mơmot lơ 14/3.

Amăng anun, tơhan pơgang guai hơmâo 8 anih plĕ hră tañ ƀơi hơdôm Puih kơđông tơhan pơgang guai hăng anom bruă yua tơhan pơgang guai wai lăng; Kông an tơring čar pơphun ƀơi dua anih či sang mrô 58 jơlan Nguyễn Tất Thành hăng 457 Lê Duẩn; hơdôm anom bruă Tơhan pơphun plĕ ƀơi sang jơnum Tiểu đoàn Bộ binh 303 hăng hơdôm anom bruă bơdjơ̆ nao. Kiăng pơhlom bruă plĕ hră tañ djơ̆ hăng tơlơi pơtrun, rơnuk rơnua, dưi ngă pô, Jơnum min ruah khua tơring čar Dak Lăk kiăng hơdôm anom bruă čih hơdră ngă bruă tong ten, lăng rơđah rơđông bruă prăp rơmet; pơtrut pôr pơthâo, tĕp hră mơnuih nao plĕ, hrơi mông hăng anih nao plĕ.