VOV4.Jarai-Anom bruă pơsir bruă mă tơring čar Dak Lak brơi thâo, klin Covid 19 dưi pơgăn ƀiă laih, ngă kơ lu tơlơi gêh găl ĕp glăi bruă mă amăng tơring čar. 9 blan rơgao, anom bruă anai hơmâo lăi pơthâo bruă mă kơ giăm 6.500 čô mơnuih. Mrô mơnuih hơmâo bruă mă laih jơnum lăi pơthâo lĕ 2.166 čô, dưi djop 90% akŏ bruă sa thun. Amăng mrô rơbêh 2.100 čô mơnuih ĕp bruă mă, hơmâo 1.282 čô mơnuih mă bruă ƀơi tơring čar, 799 čô mă bruă pơ tơring čar pơkŏn hăng 85 čô mơnuih nao mă bruă apah pơ dêh čar tač rơngiao.

Tui hăng ơi Nguyễn Văn Cường, Kơ-iăng Khua anom bruă pơsir bruă mă tơring čar Dak Lak, amăng 3 blan tal pă thun 2022, anom bruă anai pơčrâo brơi bruă mă kơ 2.600 čô mơnuih, lăi pơthâo sit nik kơ 1.200 čô. Kiăng dưi ngă boh tơhnal anai, hrom hăng kơtưn bruă pơtô hăng pôr tơlơi pơhing kơ bruă hơduah ĕp bruă mă kơnang kơ plăng website hăng plang facebook, anom bruă pơthâo bruă mă ăt pơtrut bruă pơčrâo brơi, ĕp bruă mă pơ djop sang bruă mơtam.

 Nay Jek: Pơblang