Ƀơi mông mă bruă, ƀing pơ ala kơ khua mua djop gơnong bruă amăng tơring čar Dak Lak hơmâo lăi pơthâo tơlơi tơnap tap hăng rơkâo gơnong dlông sem glăi, pơsir brơi anŏ gun bruă pơđĭ kyar bơwih ƀong huă mơnuih mơnam ƀơi tơring čar amăng thun blan pơ anăp. Amăng anun, bruă đing nao hlâo hloh kiăng čuk pơkra jơlan rơdêh nao rai amăng kual, amăng lăm kual Dap Kơdư. Pơdjơ̆ nao kơ bruă ngă tui hơdră dêh čar pơtrun, lu tơlơi rơkâo đĭ hăng ƀing pơ ala mơnuih ƀôn sang dêh čar brơi sem glăi ngă tui hră pơtrun amăng tơlơi phiăn kiăng huăi bơrơkua nao rai.

Ƀơi mông mă bruă, ƀing khua mua ăt rơkâo đĭ lu tơlơi pơdjơ̆ nao git gai mơ̆ng ding jum, anom bruă gơnong dlông hăng bruă ĕp mă kông ngăn amăng gŭ lŏn, bruă pơhlôm nua, tơlơi phiăn, pơblih rơnoh prăk blan, sang dŏ, anŏ djru ba ană plơi pla mơnuih mă bruă apah, mrô mơnuih mă bruă sit nik amăng gơnong bruă pơtô hrăm, bruă mă pơkă hnong, ba yua lŏn mơnai…..Grup khua pơ ala mơnuih ƀôn sang dêh čar ƀơi tơring čar Dak Lak čih pioh abih tơlơi pơgôp hiăp pioh mơ-it đĭ amăng mông jơnum prong khua pơ ala mơnuih ƀôn sang dêh čar hăng mơ-it djop ding jum anom bruă sem lăng.